Paula Sande: «A economía prateada, de maiores de 55 anos, cada vez é máis relevante»

Joel Gómez SANTIAGO / LA VOZ

SANTIAGO

xoan a. soler

«O noso obxectivo é un envellecemento activo con formación permanente», di a directora das Aulas Sénior de Galicia

04 oct 2021 . Actualizado a las 22:02 h.

A Asociación Cultural Galega de Formación Permanente de Adultos, ou Aulas Sénior de Galicia (Ategal), inicia mañá outro curso, con actividades nas súas dependencias de Virxe da Cerca e en liña. Hai máis de 40 anos comezaron na cidade, coas denominadas aulas da terceira idade: «o noso obxectivo é favorecer un envellecemento activo con formación permanente para as persoas de máis de 55 anos», afirma a súa directora, Paula Sande. Recentemente participou no primeiro congreso de economía prateada, e celebraron o 1 de outubro, o día das persoas maiores.

-Por que «economía prateada»?

-É un sector en auxe, porque se refire á economía de maiores de 55 anos, cada vez máis relevante polo PIB que moven. No congreso, que se celebrou os días 22 e o 23, contei o que facemos, e interesou a representantes doutras comunidades como modelo.

-Que lles interesou máis?

-O perfil das persoas maiores mudou, non é o mesmo que hai 40 anos. Son un colectivo moi diverso. Moitos maiores de 55 anos gozan de independencia física e económica; teñen capacidade, tempo e ilusión para inquietudes e gustos; moitas están xubiladas e podían aínda traballar.