Razóns para a circunvalación de Sigüeiro

Manuel Miras, alcalde de Oroso
Manuel Miras, alcalde de Oroso

Nos tempos que vivimos non é sostible que unha poboación coma Sigüeiro, de 4.000 habitantes, soporte cada día o paso de algo máis de 22.000 vehículos, dos cales 4.000, un por veciño, son de gran tonelaxe. Isto supón un perigo latente, ruídos constantes e duplicar as emisións de CO2. Por iso defendo unha vía alternativa para ese tráfico denominada Circunvalación de Sigüeiro, que unirá a N-550 desde a rotonda de saída da AP-9 coa estrada de Sigüeiro ao aeroporto.

Esta circunvalación, que foi ben acollida tanto polo Ministerio de Transportes, Movilidad y Agenda Urbana como pola Demarcación de Estradas do Estado en Galicia, ten como obxectivos:

1. Desviar o tráfico pesado, que é o máis contaminante, ruidoso e perigoso para a seguridade viaria.

2. Protexer a Ponte Medieval de Sigüeiro, pois de seguir con remendos dentro de pouco xa non lle quedará nada de histórico nin de medieval.

3. Dar unha saída cómoda, segura e rápida ás empresas emprazadas nas catro zonas industriais de Oroso, que suman máis de 600.000 m2 de chan industrial. Uns polígonos que mellorarían a súa conectividade e serían máis atractivos para a implantación de novos proxectos.

4. Protexer o noso medio ambiente e patrimonio. Desde o punto de vista medioambiental, vaise utilizar como base o estudo da alternativa que o Ministerio tiña previsto desde Ordes Sur-Marantes (Santiago). E desde o punto de vista patrimonial xa está case informado, polo que non vai afectar nin a casas nin a castro nin nada polo estilo.

Sei que nestes momentos hai voces que din «por que non aproveitas o enlace da AP-9 e non fas máis estradas?». Non renunciamos a que a AP-9 sexa gratuíta, pero son cousas distintas e unha non implica á outra. A autopista non solucionaría o tránsito local. Non é práctico, nin cómodo e mesmo dubido que ata sexa legal. Que dirían os empresarios dos polígonos e os transportistas se os obrigamos a coller a AP-9 para ir ao polígono da Sionlla, ao do Tambre ou a Costa Vella? Aínda que fose gratis só poderiamos limitar o tráfico pesado no centro urbano de Sigüeiro cunha estrada alternativa.

Por iso, desde este Concello debemos e temos que estar cada día empuxando para que esta infraestrutura, vital para o futuro de Sigüeiro e Oroso, poida ver a luz máis pronto ca tarde.

Por Manuel Mirás Franqueira Alcalde de Oroso

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
0 votos
Comentarios

Razóns para a circunvalación de Sigüeiro