José Fernánez Alborés: «Temos xa oito empresas interesadas no polo biotecnolóxico da Sionlla»

Na Asociación Área Empresarial do Tambre, que preside, confían en comezar as obras en breve e que funcionen a finais do ano 2022

José Fernández Alborés, presidente de la Asociación Área Empresarial do Tambre
José Fernández Alborés, presidente de la Asociación Área Empresarial do Tambre

santiago / la voz

«O obxectivo do Polo de Innovación en Biotecnoloxía na Sionlla contempla tres liñas principais: promover que se instalen novas empresas dese sector que se constitúan en Santiago; consolidar as que hai, favorecendo que medren; e atraer outras de fóra para que veñan para ese espazo. Para iso haberá un ecosistema que fomente, facilite e axude a investigación, infraestruturas, servizos especializados, persoal e outras necesidades, para conseguir ese obxectivo. Estamos dispostos a iniciar os traballos de inmediato, mover terras nun mes. Os edificios programados teñen que estar finalizados no verán do 2022 para que comecen a funcionar as empresas a finais do próximo ano», afirma José Fernández Alborés, presidente da Asociación Área Empresarial do Tambre.

-En que situación está este proxecto?

-Comezamos no ano 2015, para impulsar a industrialización de Santiago, e en xaneiro do 2016 os principais axentes socioeconómicos asinaron o Acordo da Sionlla. Nos tres anos seguintes, coa colaboración do Clúster Tecnolóxico Empresarial de Ciencias da Vida (Bioga) deseñamos o Polo de Innovación en Biotecnoloxía, implicando a dúas consellerías da Xunta, o Concello, a USC e a Cámara de Comercio, e o proxecto está avanzado.

-Como de avanzado?

-Dispomos dunha reserva de solo a través do Instituto Galego da Vivenda e Solo (IGVS) de 63.000 metros cadrados; e dunha parcela municipal, da que estamos pendentes que nos próximos días finalice a tramitación para pór a disposición do proxecto inicialmente 14.000 metros cadrados máis. Eses terreos poderán aumentar, de ser necesario. Neles irán as dúas fases iniciais.

-Como son esas fases?

-A primeira, na parcela municipal, contempla un edificio con laboratorios de 50 metros cadrados e outras dotacións para que se instalen, e medren, empresas biotecnolóxicas como as que emerxeron da USC ou da investigación sanitaria de Santiago e que nestes anos se dispersaron por varios lugares. Na Sionlla poderán colaborar e avanzar para a súa consolidación. Esta fase é público-privada: o Igape financia 4 millóns de euros e traballamos para conseguir outro millón máis da iniciativa privada.

-E a segunda fase?

-As dúas fases prosperarán ao mesmo tempo. A segunda prevé un edificio para espazos industriais para empresas consolidadas, con naves duns 500 metros cadrados, que deseñarán segundo as súas necesidades. A situación será no solo reservado do IGVS. Esa fase será totalmente privada, prevé un investimento duns 18 millóns de euros.

-Onde están os terreos?

-Están situados ao fondo do polígono da Sionlla, próximos á entrada do novo orbital e da conexión coa autoestrada.

-Como se xestionará todo iso?

-Unha empresa construtora vai pór de acordo as diferentes partes, para edificar; e hai unha entidade xestora do proxecto, que é Sionlla Biotech S. L., onde participan a nosa asociación, o Concello coa USC, e a Cámara de Comercio. Temos tamén un Consello Científico asesor.

-Participa a Deputación?

-Esperamos que se sume, como anunciou o seu presidente.

-E hai empresas interesadas?

-Si, hai varias interesadas na primeira fase, e oito que asinaron expresións de interese na segunda fase e están pendentes das condicións. Temos contactos para que veña algunha multinacional, pois pensamos que serviría de atractivo para outras, e que así potenciarían máis o polo.

«O máis complicado foi pór de acordo a todas as partes»

O presidente da Asociación Área Empresarial do Tambre, co secretario Ramón Lois e o xerente José Manuel Beceiro avanzaron esta semana con Roberto Graña e Pablo López, da consultora que asesora á entidade neste proxecto «na posibilidade de atraer algún macroproxecto singular con financiamento europeo, dos que agora se están a proxectar», afirma Fernández Alborés.

-Como queren que sexa o futuro desta iniciativa biotecnolóxica?

-O futuro que imaxinamos é que dentro de 10 anos haxa empresas biotecnolóxicas que ocupen os dous edificios e o resto do espazo das dúas fases iniciais que arrancarán este año. E habería unha fase posterior, no entorno da Sionlla, fóra desas infraestruturas, para empresas que veñan instalar unha nave industrial, para aproveitar as sinerxías e posibilidades que ofrecerá o biopolo. E hai unha segunda parte, que contempla acrecentar industrias da madeira, outro sector en que Galicia ten recoñecemento e que conta en Santiago cunha empresa tractora, que é Finsa.

-Por qué un proxecto así?

-Porque viamos que o polígono da Sionlla se estaba enchendo de empresas basicamente comerciais e de servizos, e pensamos que se debía facer algo para potenciar a industrialización. Con Bioga, están involucrados outros clústeres, como os da alimentación, a saúde ou a madeira. A investigación, a biotecnoloxía e a madeira son fortalezas que teñen Santiago e Galicia, das de máis potencial; este proxecto transcende a Santiago. Como acontece co polo da automoción en Vigo, o das TIC na Coruña ou o aeroespacial en Lugo.

-Como dialoga este polo tecnolóxico coa realidade da cidade?

-Na investigación biomédica, en centros como o Ciqus ou o Cimus, e outros, traballan 1.200 investigadores. Teño amizade hai tempo con Ángel Carracedo, e o seu grupo é máis grande que a maior parte das empresas de Santiago. Son persoal moi cualificado, que custa moito formar e que debemos reter, que non se vaian para fóra. Temos que reverter a situación e conseguir que moito persoal cualificado, que se tivo que ir, poda regresar. O polo será unha oportunidade para profesionais e empresas que xa temos.

-Que foi o máis difícil até agora?

-O máis complicado foi pór de acordo a todas as partes, a representantes políticos de partidos diferentes, necesitamos que todos se movan e apoien; e implicar a todas as institucións e entidades. Máis da metade das empresas biotecnolóxicas galegas están radicadas a un máximo de 60 quilómetros, Santiago ten que aproveitar esta posibilidade.

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
5 votos
Comentarios

José Fernánez Alborés: «Temos xa oito empresas interesadas no polo biotecnolóxico da Sionlla»