Xosé Miguéns: «Algunhas mudanzas que viñeron pola covid van continuar no ensino»

O profesor e director do colexio de Lamas de Abade, que se xubila o día 31, insiste en defender que se habilite un campus non universitario para 3.000 estudantes desa zona da cidade


SANTIAGO / LA VOZ

Para Xosé Miguéns, docente no colexio público de infantil e primaria de Lamas de Abade hai 16 anos, e director nos últimos 11, hoxe é o último día de traballo no ensino, pois o 31 é a súa xubilación. Onte recollía xa cousas: «Sei que ao principio botarei de menos o colexio», afirmaba.

-Como foi esta etapa profesional en Santiago?

-Vin para Lamas de Abade no 2004. No segundo ano comecei a exercer como xefe de estudos coa anterior directora, Cruz Vázquez. E Mar Rodríguez, que é xefa de estudos comigo hai cinco anos, vai ser quen me substitúa.

-O colexio aumentou e mudou moito, é agora suficiente?

-Houbo un importante incremento de alumnado, xa debemos ser o segundo colexio con máis escolares de Santiago, 548, con 3 aulas nos seis cursos de primaria, excepto en cuarto en que temos 4 aulas; e 2 aulas nos tres cursos de infantil. A zona de influencia aumentou moito, e continúa o crecemento. A ampliación do edificio de infantil parecía unha solución hai 2 ou 3 anos e agora xa non parece tan claro. E tamén está vindo alumnado doutras zonas.

-E nos servizos?

-Conseguimos consolidar o comedor no CIFP Compostela, e comezar con outro novo para infantil, iso foi importante. Ou ofrecer actividades de conciliación todo o ano, menos en agosto, excepto estes dous últimos anos polas obras de ampliación do novo edificio de infantil e pola covid. E o laboratorio de idiomas, a mellora da biblioteca, a radio... agora mesmo temos máis servizos que noutros colexios.

-Como se conseguiron?

-Inflúe a xestión levada desde o centro, en colaboración coa ANPA, que significou un complemento importante para o plan de actuación en madrugadores, no comedor ou nas actividades; dan un servizo de conciliación que doutro xeito sería inviable.

-Defendeu que se faga un campus non universitario en Lamas de Abade, mantén esa idea?

-Sempre falei diso, e vexo como agora o asume máis xente, mesmo en institucións. Aquí están un CIFP; un instituto de ESO, unha escola infantil, un centro de educación especial, o noso de primaria, e o Ramón Cabanillas está próximo. Hai uns 3.000 estudantes que se moven na zona e sería bo que se dotase de servizos apropiados e de mellor mobilidade. Penso que é o espazo de Santiago con máis alumnado non universitario e a especificidade dun campus sería positiva.

-Teñen relación os centros da zona?

-Si que a hai. Comezamos a celebrar o entroido entre todos hai 8 anos; e nós tamén temos relación co CIFP polo comedor e polo ciclo de educación infantil; co instituto, polo ciclo de peiteado; con Raiola, porque o seu alumnado ten como referencia o noso centro... aproveitamos recursos e hai confluencia, que se quere fomentar porque beneficia a todos.

-Exerceu nun instituto e regresou a primaria, como foi esa mudanza?

-Fixen unha especialidade nova a finais da década dos 90, Audición e Linguaxe, que me permitiu concursar para Lamas de Abade. Notei unha diferenza grande, aínda que resultou positivo vir para aquí e colaborar para mellorar a situación do ensino.

-Como valora os meses da covid?

-Penso que nin eu nin ninguén pensaba que puidese acontecer algo así. Este é un curso moi diferente, o máis difícil. Comezamos con medo a ter que pechar o colexio por causa dos contaxios e houbo poucas incidencias. Vemos a necesidades de recuperar a anterior normalidade para moitas cousas; porén, mudanzas que viñeron pola covid van continuar, como as organizacións das entradas e saídas do centro; ter máis recreos; ou os dúas quendas no comedor. Até dunha situación tan negativa se poden conseguir algunhas solucións positivas.

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
1 votos
Comentarios

Xosé Miguéns: «Algunhas mudanzas que viñeron pola covid van continuar no ensino»