Tamén traerá para esta temporada outros espectáculos en réxime de coprodución
23 sep 2020 . Actualizado a las 04:50 h.O Centro Dramático Galego arrancará temporada escénica con tres novas producións propias, que serán O charco de Ulises, Terceiro acto e Serva me, servabo te. A primeira é unha recreación da Odisea de Homero dirixida por Marián Bañobre e Santiago Cortegoso, mentres que a segunda homenaxea os veteráns da escena e estará ao cargo de Andrea Jiménez e Noemí Rodríguez. No terceiro caso, Serva me, servabo te é unha proposta cun enfoque máis contemporáneo e cunha proposta de hibridación das linguaxes. Na dirección desta última estarán Belén Bouzas, Fran Martínez e Diego M. Buceta.
O director do Centro, Fran Núñez, deseñou unha planificación que se centra na montaxe e distribución de tres espectáculos abertos á diversidade de temas e estilos da escena actual, todos eles con dramaturxias contemporáneas. Nas tres obras cambian os modelos de produción e os prazos tradicionais, pois o obxectivo é o de lograr un calendario de traballo en que a prioridade será a contratación de intérpretes e creadores.
O traballo conxunto de dramaturxia e dirección por parte de cada equipo de responsables artísticos, así como o adiante dos ensaios e a elaboración dunha rede de transporte entre localidades próximas permitirá maximizar a rendibilidade social das propostas da nova temporada deseñada polo Centro Dramático Galego.
Ademais, o CDG tamén traerá para esta temporada outros espectáculos en réxime de coprodución e novas iniciativas ideadas para reforzar a vocación de servizo público e de cooperación co sector nun contexto sociosanitario adverso.