Ana Barreiro: «Temos amadriñada unha parte do río Sar para o seu mantemento e limpeza»

En setembro incorporan a secundaria e este verán celebran un campamento urbano


santiago / la voz

O colexio Montessori Compostela, situado na colexiata de Sar, incorpora xa en setembro, no que será o seu quinto ano lectivo na cidade, o ensino secundario. Antes, desde hoxe mesmo ata o 31 de xullo, celebra Eco-Camp Montessori, un campamento que realiza con colaboración da asociación Non é o Mesmo, de Santiago; a galega Proxecto Ríos; InteRed, de ámbito estatal; e a internacional Greenpeace. Destacarán os temas de educación ambiental. «Comezamos a promover este proxecto educativo no curso 2014-2015 e abrimos en setembro do 2016. Considero que o colexio está consolidado e integrado no movemento pedagóxico de María Montessori. Recibimos recentemente a certificación da axencia dos Estados Unidos, coa autorización para comezar o próximo curso co Programa de Adolescentes Montessori, para a etapa de 12 a 16 anos, e así cubriremos toda a escolarización, da infantil á secundaria», afirma Ana Barreiro, directora do centro.

A filosofía desta pedagoxía é «educar para a vida e para a construción dunha cidadanía responsable, a través do desenvolvemento de valores como a liberdade, a solidariedade, a coeducación, a responsabilidade, o desenvolvemento sostible, a educación para a paz ou o respecto á diversidade», acrecenta.

O grupo de escolares que ingresou no centro con 8 anos, explica, «finalizou a primaria en xuño e comezarán en setembro o programa de adolescentes. Ter todas as etapas de ensino obrigatorio é un reto precioso, para axudar ao alumnado a vivir ese cambio que representan estas etapas educativas, desde a infancia á adolescencia. O método Montessori desenvolve as capacidades emocionais e prepara para contribuír activa e positivamente na sociedade, segundo medran. Tamén aproveitamos as posibilidades pedagóxicas da colexiata e a súa contorna», esclarece.

O centro tamén se adapta ás esixencias da pandemia do covid-19. Ten espazos amplos, que favorecen manter as distancias recomendadas, e contemplan un máximo de 15 escolares por aula, con mestura de idades na sala «e entre 5 e 7 por educadora. Somos un equipo docente multidisciplinar de seis persoas con formación da Asociación Montessori Internacional», manifesta Ana Barreiro.

«Non somos un centro para nada masificado, atendemos a 40 nenos e nenas e tamén nos interesa a formación das familias. No próximo curso, un dos aspectos que contemplamos é asegurar que as familias do alumnado se preparen ben perante o reto de posibles confinamentos futuros», afirma a directora.

No campamento urbano de verán, orientado para nenos e nenas de 3 a 12 anos, salientan os temas de medio ambiente. «Na primeira das cinco semanas que vai durar, o tema será a auga e contaremos coa presenza do Proxecto Ríos. Temos amadriñada unha parte do río Sar, próxima ao colexio, para facer o seu mantemento e limpeza», resalta a directora deste centro privado.

Outra semana estará dedicada á natureza, «e contaremos con Xosé Manuel Durán, da asociación Non é o mesmo, que tamén se referirá ao mundo das abellas e á súa importancia». Do 20 ao 24 de xullo traballarán con Greenpeace «e aproveitaremos para facer moitas saídas pola contorna, e contacto directo, con actividades sobre ecoloxismo, como promove esa organización naturalista». Na última semana contarán coa presenza da oenegé InteRed, e salientarán o tema da equidade. A outra semana terá como obxectivo insistir na terra. «O medio ambiente é un dos obxectivos pedagóxicos centrais da nosa metodoloxía e este campamento urbano é unha continuidade do traballo que realizamos», indica Ana Barreiro.

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
10 votos
Comentarios

Ana Barreiro: «Temos amadriñada unha parte do río Sar para o seu mantemento e limpeza»