Manuel González: «Xuntamos o trap e a muiñeira aproveitando as súas coincidencias»

O dúo Boyanka Kostova lanzou o día 5 o disco «Os dous de sempre», con temas máis «madurados»


Santiago / la voz

O concerto inicial da xira co seu segundo disco, Os dous de sempre, ía celebrarse na sala coruñesa Mardi Gras o mesmo día que se decretou o estado de alarma. Tamén en marzo ía ver a luz este novo traballo do dúo compostelán Boyanka Kostova, pero finalmente foi o pasado día 5 cando o lanzaron, e a resposta que están obtendo é moi boa. «Está funcionando moi ben nas redes sociais. Entón, do que máis ganas temos agora mesmo é de ver como responde a xente nos concertos en directo. Se o incremento que se viu nas redes se traduce en afluencia e o a fuego que estea o público con nós vai ser bestial», asegura Manuel Chicho González González, compoñente deste dúo xunto a Cibrán García García.

O título do traballo, Os dous de sempre, xa denota os seus sinais de identidade. Por unha parte a referencia a Castelao, «que somos fans del», e por outra banda «nós tamén somos os dous de sempre, levamos facendo música xuntos desde hai moitísimo tempo». E desde esa normalidade de ser os dous de sempre é desde a que fala Chicho para explicar a música dos considerados como os pioneiros do trap galego. «Antes de nada, queremos ser coherentes. O xénero que, entre aspas, facemos está identificado con certas temáticas, e nós, como somos rapaces de aquí de Santiago sen malicia ningunha e que nos gusta pasalo ben, reproducimos a nosa vida a través diso, e facémolo en galego porque non ten sentido falar co teu compañeiro en galego e compoñer en castelán», afirma, para engadir que «somos galegofalantes e estamos na vintena, e non podemos deixar desatendida ningunha das dúas cousas».

Posiblemente unha das cancións deste novo disco, Muinheira de interior -que conta tamén cun videoclip-, sexa un bo exemplo desa mestura, coa muiñeira e o trap indo da man no mesmo tema. Ao igual que o gaiteiro Carlos Núñez, lembran esa conexión de ambas as músicas. «Son cancións en catro pulsos subdivididas en golpes de tres. Se quitas sintetizadores, gaitas e demais, o esqueleto rítmico do trap e o da muiñeira son iguais, como pode pasar coa rumba e o reguetón. Como hai esa coincidencia, aproveitámonos dela para xuntalos», afirma Chicho González. E despois de pensar que tema podían coller como base optaron pola Muiñeira de Cabana, do grupo Milladoiro, e interpretan con ela letras dos temas Arrastráchelo cu polas pallas e Unha noite no muíño. Este segundo traballo complétano outros seis temas máis, que foron desenvolvendo durante máis dun ano. «Realmente non pensabamos facer un disco, senón que fomos facendo temas e chegou un momento no que parecía que as cousas tiñan sentido xuntas», explica o músico. Así que entre a gravación da primeira canción e a última pasou un ano.

E marcan moitas distancias co seu primeiro traballo, Nova canción galega? «A única diferenza que podemos notar nós é que no anterior chegabamos e faciamos unha canción do que se nos ocorría, e esta vez teñen un concepto máis traballado. Por exemplo, a da muiñeira tivemos que madurala moito para que quedara simpática e como nós queriamos. Neste disco as cousas están máis maduradas. Non é mellor nin peor que o primeiro, pero é a diferenza», responde. Iso si, «se a alguén lle interesa o que pensamos nós a nivel persoal vaino atopar máis en Nova canción galega». Á hora de elixir os temas para abordar, a condición «é que sexa algo que nos represente a nós en primeira instancia e no que poida verse representado calquera que o escoite despois, con iso xa nos vale», destacando que «somos dous rapaces e intentamos pasalo ben». Ademais, en canto a estilos «é un pouco o que vaia xurdindo, hai temas máis trapeiros, máis reguetoneiros, boleros...», di Chicho, que ten claro que se vivira hai 600 anos sería un xograr.

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
3 votos
Comentarios

Manuel González: «Xuntamos o trap e a muiñeira aproveitando as súas coincidencias»