Sesenta familias promoven un colexio de infantil e primaria só en galego

Pretenden reunir nun só edificio os tres centros da escola Semente da cidade


santiago / la voz

Un grupo de familias de Santiago, co apoio da asociación Gentalha do Pichel, promoveron hai 9 anos a escola Semente, na rúa Salvadas. Pretendían un centro para escolarizar as súas fillas e fillos en galego. Nos anos seguintes, novas familias e persoas apoiaron a iniciativa. Abriron unha segunda escola infantil Semente, na Torreira. Cando o primeiro alumnado chegou á idade do ensino primario, escolleron outros centros da cidade. Porén, os pais e as nais preferían o modelo da Semente, e conseguiron que lles aprobasen unha escola internacional, que abriu hai dous cursos nas Cancelas. A iniciativa envolve agora a máis de 60 familias, que queren xuntar os tres centros. Xa se fixeron cunha antiga vivenda, en Moas de Abaixo, e realizan unha campaña de mecenado para xuntar un mínimo de 90.000 euros para rehabilitar ese espazo como o centro de infantil e primaria que ansían.

Así o esclarece a recoñecida actriz e xornalista Comba Campoi. Ela é unha das persoas que escolleron esta escola para os seus fillos. «É un proxecto pedagóxico moi interesante e queremos que se consolide. Nas Moas pretendemos intervir nun edificio de 600 metros cadrados, e 3.500 máis de terreo, que favorecen o traballo co alumnado en contacto directo coa natureza. Ese é un dos obxectivos centrais da Semente. Xa nos actuais locais hai hortas, con ese fin», esclarece Comba.

Na vivenda de Moas precisan acondicionar as aulas e os restantes espazos necesarios. Tamén se instalará un elevador. «É un proxecto ambicioso, queremos que teña as mellores condicións para o ensino. Aínda que non se trata dun colexio privado. As familias traballamos por dar continuidade a un proxecto pedagóxico. Tanto en infantil como en primaria o alumnado non está segregado por idades. Nunha mesma aula hai escolares entre 6-8 anos; é un modelo que considera interesante que diferentes idades convivan, que se apoien, para fortalecer a cooperación. Un modelo semellante ao que funcionaba no rural galego, con moitas vantaxes pedagóxicas», acrecenta Comba Campoi.

«No anterior mandato municipal tentamos, sen éxito, que o Concello nos cedese algún local ou terreo . Vimos que a única solución para termos un local novo pasaba por tomarmos a iniciativa e mercar un espazo apropiado. O de Moas reúne os requisitos. Agora o obxectivo é conseguir o financiamento necesario para facer todas as reformas que precisa».

Comba insiste en que as familias colaboran «como xa facemos agora para o mantemento dos tres locais. A Semente é un proxecto comunitario, do que somos parte as familias. Non se trata dunha empresa que ofrece un servizo, onde deixamos os nosos fillos e fillas e nos esquecemos; como familias participamos no financiamento, na xestión da escola. Hai unha organización asemblearia, é un proxecto desde a sociedade civil. Consideramos que é unha boa maneira de manter a lingua do país, por falta de maior implicación desde as Administracións».

Algunhas familias son de Teo ou Ames «aínda que a maioría residimos en Compostela. Hai un proxecto semellante en Brión, no que se traballa desde o ano pasado, e confiamos que se promovan máis. O ideal é que sexan escolas de proximidade. Moas de Abaixo facilita usar o transporte público, unha opción tamén moi interesante», di Comba Campoi.

A primeira semana reuniron o 25 % dos 90.000 euros que necesitan conseguir

A campaña de mecenado permanece aberta. Toda a información está na Rede, en “Projeto Moas», e para contribuír no enderezo https://gl.goteo.org/project/projeto-moas e aí levan reunidos máis do 25 %, xa superan os 27.000 euros, dos 90.000 euros que necesitan conseguir para garantir a viabilidade. Aínda que a cantidade óptima son 130.000 euros, indican. Tiveron máis de 150 achegas para atinxir o financiamento que se propoñen. Chegaron desde lugares ben distintos, como a Amazonia, Quebec (do Canadá), o Curdistán ou a comunidade de Asturias, aínda que a maioría son galegas e da comarca de Compostela. Entre quen apoian a iniciativa hai así mesmo nomes ben coñecidos da cultura do país.

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
13 votos
Comentarios

Sesenta familias promoven un colexio de infantil e primaria só en galego