Ibuprofeno volve ás orixes para abordar o cambio climático

A compañía, que cumpre 10 anos, estrea por primeira vez unha obra en Santiago, «O mel non caduca»


Santiago

31 de xaneiro e 1 de febreiro • Teatro Principal • 12 euros • Ibuprofeno Teatro deixa atrás a súa triloxía coa comida como protagonista para mergullarse na obsolescencia programada e o cambio climático en O mel non caduca, a montaxe que este venres día 1 estreará no Teatro Principal de Santiago. Dirixida e con texto de Santiago Cortegoso, está interpretada por Marián Bañobre e Avelino González.

Dous científicos que en 2173 tratan de crear sinteticamente unha abella a partir do último tarro de mel que se conserva e dous irmáns que volven á casa natal na aldea despois da morte da súa nai para decidir que fan coa casa e as abellas conforman as tramas principais. Polo medio delas, «están salpicados textos breves que non entran en ningunha das tramas pero que ilustran sobre elas, escenas xestuais, de movemento...», explica o director, Santiago Cortegoso, que engade que «con este espectáculo volvemos ás orixes da compañía de facer montaxes máis de creación». Así, Raclette e Casa O’Rei están montados a partir de textos escritos previamente e «neste fixemos un proceso de documentación moi longo sobre a obsolescencia programada, sobre o cambio climático e todo o ciclo perverso do capitalismo sobre o cal temos que consumir moito, para que se produza moito, para que a economía medre e iso fai que se contamine e que a natureza saia prexudicada».

Escenografía con colmeas

As orixes de O mel non caduca hai que buscalas no 2013 cando dende Ibuprofeno empezaron a facer talleres sobre a obsolescenia programada e a relación do ser humano cos obxectos. Foi a finais do 2018 cando decidiron que había que facer algo sobre esa «teima» coa que levaban anos e dou lugar a «unha peza fragmentada e con varias historias, con moito movemento escénico, no que mundo do mel une todo. Pareceunos unha metáfora perfecta de todo o que está pasando coas abellas, coa apicultura... A través diso contamos todo ese fenómeno do capitalismo e o cambio climático». Toda a posta en escena é con colmea e material de apicultura. Pero aínda que «o tema é duro e parte dunha visión moi pesimista da humanidade», o dramaturgo explica que hai tempo para o sorriso «porque intentamos buscarlle unha visión irónica e rirnos de nós mesmos como seres humanos».

O mel non caduca será a primeira obra que Ibuprofeno Teatro, que cumpre dez anos, estrea en Santiago. «Hai quen di que conleva certo risco estrear en Compostela porque é unha praza importante, pero tamén é un teatro histórico, e fainos moita ilusión», afirma Cortegoso. Despois de Santiago, fará paradas en Ourense, Boiro, Vigo, Cangas, A Coruña, Narón e Mondim de Basto (Portugal).

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
1 votos
Comentarios

Ibuprofeno volve ás orixes para abordar o cambio climático