Beatriz Noya e Xosé Manuel Durán: «O consumo pode facer que o lugar onde vivimos sexa máis próspero»

Promover un punto de distribución de alimentos producidos na zona rural de Compostela, que funcione na praza nova do Ensanche para que, deste este mercado, teñan saída para estabelecementos e para o público en xeral. Ese será un dos asuntos da orde de traballos da asociación Non é o mesmo, na asemblea que celebra este sábado, desde as 18.00 horas, na Casa das Asociacións de Cornes. O encontro utiliza como lema «Por unha economía local para as persoas» e terá carácter aberto, afirman Beatriz Noya Mariño, investigadora da USC e integrante deste proxecto como consumidora, e Xosé Manuel Durán, propietario dun comercio de alimentación do Ensanche.

Non é o mesmo comezou a funcionar en xuño. Neste tempo integrou a 12 tendas e cinco restaurantes, e a labregos e consumidores da contorna; en total, 80 socios e socias. Queren que o encontro deste sábado sirva de lanzamento para unha maior visibilidade en Santiago e na súa contorna, e para iso terán un convivium ao final: «Precisamos unha economía comprometida coa sociedade e co planeta; comprometida coas pequenas empresas locais, cos pequenos talleres artesáns e coas labregas do noso rural. Temos o convencemento de que o futuro do comercio local das cidades e das vilas do noso país pasa por pór en valor ás persoas, por fomentar “corpo a corpo” o contacto real fronte ao virtual», afirma Beatriz Noya.

A asociación está organizada por gremios: do comercio local, de restauración, de consumidores e de profesionais labregos. «Todas as persoas que participamos asinamos unha carta de compromiso para manifestar publicamente que nos comprometemos social e medioambientalmente. E pretendemos organizar visitas unha vez ao mes a persoas asociadas para que expoñan publicamente o seu compromiso e o que fan para que sexa realidade. Así desexamos que todas as persoas sexan conscientes de como o consumo pode facer que o lugar onde vivimos sexa máis próspero, porque o consumo é unha ferramenta moi poderosa. E favorecer que o beneficio dese consumo permaneza na comunidade, non que vaia para un paraíso fiscal; porque até o 80 % do gasto que se fai nunha gran superficie ou nunha multinacional vai para fóra», acrecenta Beatriz.

É por iso que defenden «o quilómetro cero, que significa que haxa a menor distancia entre o espazo onde se produce e onde se distribúen os alimentos, os produtos de artesanía e os que vende o comercio de alimentación, ou o de roupa e doutros produtos», indica.

Xosé Manuel Durán insiste en que «a idea é fomentar un modelo de economía local que favoreza a propia comunidade».

Entre os compromisos que poden asinar as persoas e entidades que pertencen á asociación Non é o mesmo están medidas ambientais, como por parte do comercio evitar o uso de bolsas de plástico; no caso dos restaurantes, que se poidan levar para a casa os alimentos non consumidos no establecemento; ou entre labregos e consumidores, o aforro de enerxía, entre outras. «O proxecto é amplo. O que se pretende é pór en valor ás persoas e facer visible ante a sociedade iniciativas que melloren a comunidade, o medio ambiente e o planeta», manifesta Durán.

Durán e Noya chaman a atención sobre que «non é o mesmo o prezo que o custo: un produto pode ser moi barato e ter un custo medioambiental e social moi elevado, que paguemos nós ou os nosos fillos. A propia Organización Mundial da Saúde avisa sobre isto».

---

---

---