Araceli Gago: «A radioterapia metabólica é efectiva para o tratamento de varios cancros»

Física e investigadora do IDIS, traballa para conseguir que cheguen aos doentes as doses de radiación axeitadas


santiago / la voz

Para Araceli Gago, Latinoamérica foi «unha oportunidade excelente. Ao finalizar a carreira de Física e o doutoramento na USC, ampliei estudos en Chile, na área que máis me interesaba, a radiobioloxía, que consiste en desenvolver modelos matemáticos que permitan explicar a resposta do tecido á radiación nos tratamentos. Estiven na Pontificia Universidade Católica de Santiago de Chile, que ten moi bo nivel e está ben posicionada nas clasificacións internacionais; alí conseguín unha praza nunha convocatoria competitiva de profesorado con 32 anos, algo moi complicado en Europa a esa idade», manifesta. Recentemente regresou, para traballar no Instituto de Investigación Sanitaria de Santiago (IDIS).

-Como resultou o regreso para traballar no IDIS?

-Conseguín un contrato do programa Marie Curie, da Comisión Europea, e estou integrada no Grupo de Física Médica e Biomatemática, que dirixe Juan Pardo. Manterei a colaboración con proxectos en Chile e en setembro regresarei alí uns días.

-Como é ese grupo do IDIS?

-Está integrado por cinco especialistas en Física, e colabora cos servizos de medicina nuclear e Radiofísica do CHUS.

-Ten moita presenza a Física na actividade sanitaria?

-Clasicamente, a Física Médica traballou nos hospitais, da man de especialistas en oncoloxía, para deseñar tratamentos de radioterapia, para o control das máquinas empregadas para radiodiagnóstico, e en materia de protección radiolóxica. É un traballo que favorece controlar as exposicións de doentes nas análises de diagnóstico clínico cando se usan radiacións.

-En que consiste o seu proxecto de traballo agora no IDIS?

-Traballo nun proxecto centrado na radioterapia metabólica, que é efectiva para o tratamento de varios tipos de cancro, como os de tiroide, neuroblastomas, linfomas, de óso ou tumores neuroendócrinos.

-Como é efectiva?

-A radioterapia metabólica consiste en administrar a doentes para tratar o cancro fármacos con radionucleidos, que son átomos que emiten radiación. Estes radiofármacos presentan afinidade con certos receptores das células tumorais, onde se depositan de maneira preferente, e iso permite controlar o tumor cunha dose de radiación. A técnica evita irradiar os tecidos sans circundantes e permite tratar o tumor primario, tamén células espalladas en forma de metástase, e mesmo poboacións de células aínda non localizadas polas técnicas de diagnóstico convencionais.

-E como contribúen coa investigación?

-O noso proxecto tenta desenvolver métodos para calcular a dose de radiación exacta depositada en doentes.

-É moi utilizada no CHUS a radioterapia metabólica?

-Si, o servizo de medicina nuclear trata doentes con esta terapia de xeito habitual, hai unha forte expansión nos últimos anos e en Europa xa se superan as cen mil terapias anuais. Unha normativa europea relativamente recente aconsella que as determinacións das doses se fagan de maneira personalizada para cada doente e o noso proxecto está enfocado a ese obxectivo: en mellorar a exactitude coa que se determina a dose en doentes para poder subministrar a dose a doentes de radioterapia metabólica de xeito personalizado. Hai unha colaboración estreita co doutor Álvaro Ruibal e co servizo de medicina nuclear, que forman tamén parte do proxecto.

-No CHUS funciona un ciclotrón, é de interese para ese traballo?

-Si, o ciclotrón favorece que se fagan terapias aquí e tamén ten proveito para a investigación. No noso grupo facemos cálculos matemáticos de como se deposita a dose nos tumores de doentes e validamos que os cálculos están ben feitos. Tamén podemos traballar con maniquíes para facer medidas que permitan validar os cálculos que realizamos.

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
6 votos
Comentarios

Araceli Gago: «A radioterapia metabólica é efectiva para o tratamento de varios cancros»