Santiago: Antonio Segura: «En Galicia formamos máis biólogos que os demandados polo mercado»

«Cando comecei a estudar, hai máis de 40 anos, dicían que Bioloxía era a carreira do futuro, e non daba chegado ese futuro. Agora penso que si, porque está no medio ambiente, no cambio climático, na biotecnoloxía ou na biomedicina. Estou convencido de que o século XXI vai ser o da biotecnoloxía, e xa o comeza a ser», afirma o profesor Antonio Segura Iglesias. Reelixido decano da Facultade de Bioloxía en outubro, o 10 de xullo foi o acto en que tomou posesión dese posto.

-Como está a resultar o novo grao de biotecnoloxía na USC?

-Comezamos este último curso. Para seleccionar 50 estudantes a nota de corte superou 12, foi das cinco carreiras máis esixentes do sistema universitario galego, tendo en conta os dobres graos. Penso que estamos a responder ben ás expectativas do alumnado.

-Ten boa saída profesional?

-Si, hai moita demanda. Galicia está nos primeiros lugares neste ámbito, grazas en parte a que a Xunta destinou 200 millóns de euros para o período 2016-2020. En volume de emprego e de empresas biotecnolóxicas a nosa comunidade é hoxe punteira.

-En Santiago hai tamén moitos biólogos que se dedican á investigación biomédica.

-É certo, e unha das nosas demandas é un grao en investigación biomédica. Iso depende de decisións políticas. Entre os novos líderes da investigación biomédica hai moitos biólogos; en Santiago están sobre todo no Cimus, no IDIS ou na Fundación Xenómica, é unha realidade.

-E en que situación está o Cibus?

-Ese edificio funciona como unha parte da nosa Facultade. Cando comezou, no ano 2006, quen decidían viron que era o mellor.

-E pode ser un centro singular de investigación?

-Entendo que si, e así o defendín perante o reitor ao tomar posesión esta semana. Porque no Cibus traballan grupos de investigación con nivel internacional, dedicados á acuicultura ou á patoloxía de peixes. O camiño penso que pasará por constituír inicialmente unha agrupación estratéxica, nucleada por eses grupos, da que despois derive un centro singular de investigación como o Cimus, o Ciqus ou o Citius.

-Promoveu un mestrado interuniversitario de biodiversidade terrestre. Como o valora?

-Comezou tamén este último curso, cun gran esforzo da Facultade e con moita axuda económica da USC. Porque para traballar a biodiversidade, alén das aulas, temos que enviar alumnado ao Courel, á illa de Sálvora, ás Fragas do Eume ou ao Pedroso compostelán, e iso esixe recursos.

-Hai boa coordinación coas universidades de Vigo e da Coruña?

-Para implantar este mestrado tivemos que colaborar e está sendo positivo. Son consciente de que, a pesar das diferenzas que poida haber, temos que colaborar as tres universidades galegas se queremos captar alumnado para a continuidade de grao a mestrado, que é un dos problemas que temos; unindo esforzos podemos facer unha oferta atractiva.

-E está a ser atractiva?

-Temos a percepción de que este primeiro ano foi ben neste novo mestrado, e iso é moi importante para que funcione o boca a boca entre o alumnado.

-Tamén preside a Conferencia Española de Decanos de Bioloxía; como está a carreira no Estado?

-Na conferencia están representadas 28 universidades, as públicas e algunhas privadas. Os datos que temos indican que en Galicia a oferta de prazas é excesiva.

-Como é iso?

-Entre as tres universidades, en Galicia formamos máis biólogos que os demandados polo mercado, e noutras comunidades, como Madrid o Cataluña, están por debaixo, a oferta non cobre a demanda laboral que teñen.

-Entón, aquí fabrican desempregados?

-Acontece que a formación de Bioloxía é moi transversal e acaban por ter emprego. O nivel formativo de grao, mestrado e doutoramento está moi relacionado coa inserción laboral. Fixemos estudos e comprobamos como o 100 % dos doutores en Bioloxía da USC traballan, aínda que algúns están nos Estados Unidos, o Xapón ou Alemaña.

-Como ve o futuro de Bioloxía?

-Defendo hai moito tempo que no sistema universitario galego debería haber unha especialización en bioloxía ambiental e en bioloxía sanitaria, que funcionan ben noutras universidades. Non sei se eu o verei, aínda que traballarei para deixar a semente e que así aconteza no futuro.

«Non previamos ser un dos cinco primeiros centros da Universidade con selo de calidade»

Tras estes catro anos máis de mandato, Antonio Segura afirma que querería ser lembrado «por consolidar o grao de biotecnoloxía e por implantar un dobre grao de biotecnoloxía e farmacia».

-Como foi o primeiro mandato?

-Nas grandes liñas finalizamos o plan estratéxico 2017-2020. Está pendente a adaptación da memoria do grao ás novas demandas da sociedade; fixemos unha proposta de modernización, despois de 10 anos de implantado o grao, desde o 2009, que está pendente da Comisión de Titulacións e do Consello de Goberno da USC; e da Axencia de Calidade do Sistema Universitario e da Xunta. Non esperamos problemas e confiamos comezar co novo grao no curso 2020-21. E destacaría que non previamos ser un dos cinco primeiros centros da USC con selo de calidade, que conseguimos, e iso é tamén moi importante.

-Para que vale esa calidade?

-Significa que o alumnado vai ter garantía de que hai uns procedementos de docencia que garanten que vai finalizar a carreira cunha determinada formación.

-Como é a relación da Facultade con empresas?

-Niso temos moito que facer, aínda que cada vez enviamos máis alumnado para facer prácticas en empresas privadas; e tamén en públicas, como no Concello de Santiago ou no Sergas.

-Ten moito abandono a carreira?

-Na graduación deste curso, o 19 de xullo, estarán 98 estudantes. Hai anos eramos unha titulación ponte para alumnado que non entraba en Medicina, Fisioterapia, Enfermaría ou Farmacia, cun abandono do 20 %, ou mesmo máis. Os últimos anos escolle Bioloxía como primeira opción por volta dun 85 % do alumnado que pide entrar na carreira. E o abandono diminúe, xa é dun 15 %. Aínda é máis elevado que noutras facultades de Bioloxía; debemos mellorar máis e estamos niso.