A aventura xacobea de Lennon e Dalí

Nos anos 70 quixeron facer o Camiño, con cen hippies diante


Cando o pasado 3 de xullo, Julia Bird, irmá (por parte de nai) do ex-beatle John Lennon, chegaba en peregrinación a Compostela, estaba a cumprir, dalgún xeito, un vello desexo familiar. Julia Bird percorreu o Camiño Inglés e mesmo chegou a ser proclamada este verán na Coruña embaixadora da Real Orden de Caballeros de María Pita. Esta é a segunda parte da historia xacobea dos Lennon que hoxe queremos lembrar aquí. A primeira ten como inicio París, un 24 de marzo de 1969.

En tal data coñecéronse John Lennon e Salvador Dalí. É o instante que recolle a fotografía. Segundo testemuño do propio fotógrafo, o artista francés Henry Pessar, foi el quen os presentou. Na imaxe Dalí saúda a Yoko Ono. O matrimonio viña de Gibraltar, onde celebrara a súa lúa de mel.

Salvador Dalí, autoproclamado «el pintor más famoso del mundo», quixo coñecer ao non menos célebre músico porque tiña en mente un dos seus proxectos máis extravagantes (surrealistas, poderiamos dicir sen esaxerar): facer o Camiño de Santiago con John Lennon cun grupo duns cen hippies diante, coa finalidade de atraer aos mozos e mozas á relixión católica.

Así llo contou ao seu amigo e biógrafo Antonio D. Olano (un lugués de Vilalba) polo ano 1974. No libro Dalí Secreto, de 1975, recolle Olano estas declaracións do pintor:

«Lo voy a hacer [refírese ao Camiño de Santiago], no sé cuándo, y al frente de cien hippies, convertidos a la religión católica, apostólica y romana. Para ello mantengo contacto con John Lennon».

Segundo testemuño de Antonio D. Olano no ano 2011, durante unha entrevista na televisión, foi este xornalista galego quen, durante os anos seguintes, servía de correo de cartas e telegramas entre ambos para ir pechando a estratexia a seguir coa súa peregrinación hippie. Pero non puido ser. O asasinato de John Lennon en decembro de 1980 frustrouno todo. Hoxe só nos queda imaxinar a esta parella imposible camiñando polas rúas medievais de Compostela e abrazando, un a un, cos cen hippies incluídos, ao Apóstolo catedralicio.

editor@alvarellos.info

Vive Camino

Toda la información sobre el Camino de Santiago en Vive Camino

Votación
1 votos
Comentarios

A aventura xacobea de Lennon e Dalí