«Tiña o desexo de que os meus fillos coñeceran Etiopía, a súa terra natal»

Presentou en Cineuropa a segunda parte do seu documental no país africano


Santiago / La Voz

Ovidio Fernández Sánchez (Navia de Suarna, 1962) é un lucense afincado en Santiago e co corazón en Etiopía. Decidiu adoptar un neno do país africano, pero ao coñecer a existencia dun irmán biolóxico, tivo que xuntalos. O seguinte paso foi que coñeceran a súa terra natal. Apoiado na súa profesión como cámara de Televisión Española, Ovidio organizou unha expedición da que saíu Shoots from Abyssinia. Outra viaxe máis e volveu coa segunda parte, Shoots from Abyssinia, o sur, que onte foi presentada en Cineuropa.

-¿Como xurdiu a idea de facer este documental en Etiopía?

-Esta é a segunda parte. Teño dous fillos etíopes: un de 15 anos e outro de 18. Cando adoptei ao primeiro, descubrín que tiña un irmán biolóxico, e quixemos traelo tamén. Por iso escollín Etiopía. Tiña o desexo de que os meus fillos coñeceran a súa terra natal. A primeira viaxe fixémola no 2010, e saíu a primeira parte do documental en 2012. Quedaba pendente visitar o sur do país, sobre todo, porque a etnia gurage, que é a dos meus fillos, está asentada nesa zona. O sur supón un cambio moi drástico, a África máis coñecida. Arrendamos un coche na capital e fixemos moitos quilómetros eu máis os tres fillos. Catarina, a maior, fixo as labores de produción. É unha especie de road movie. Baixamos ata a fronteira de Kenya e regresamos cara o norte.

-¿Cal era o obxectivo final do proxecto?

-Básicamente, que o meu fillo pequeno se reencontrase con seu país e se sentise orgulloso de coñecelo. Trátase dun documental que segue a liña . Intentamos dar unha imaxe real de Etiopía, que se afasta moito do concepto que temos de África. É o país que máis crece e non ten petróleo. Aquí en Galicia xa debemos estar cerca dos 1.000 nenos etíopes adoptados, e hai moitos rapaces que descoñecen a súas raíces. Tratábase de que viran iso. Recordo cando presentamos a primeira parte en Lugo que unha nai agradeceume moito o traballo porque o seu fillo podía estar orgulloso do seu país de orixe.

-¿Supuxo un gran esforzo económico emprender esta viaxe?

-A verdade é que foi barato. Primeiro, porque foi un tema familiar. Tiña a baza de ser cámara en TVE, e puiden comprar unha cámara e levamos outra a maiores. Conseguimos que nos financiase a Xunta os billetes e o aluguer do vehículo. Alí tampouco gastas moito.

-¿Non tivo medo de levar aos fillos a tal aventura?

-Foi todo un pouco improvisado, pero saíu ben. Levas aos pequenos detrás e claro... Na fronteira con Kenya, cruzamos o río con canoas que son troncos de árbores e iso asusta. Ademais, o ano seguinte, no norte de Etiopía, houbo unha masacre de turistas. Pero ao final son casos illados que non poden expandirse a todo o territorio.

-¿Será especial estrear en Santiago?

-Teño aquí aos meus colegas, a miña vida. O meu mundo está en Santiago. Cando estreas na túa cidade asiste moita xente do entorno e as emocións son moito máis fortes. Van os colegas da tele, dos medios... Sempre é un plus.

-O próximo ano cúmprense dúas décadas de Kompostela, o seu primeiro documental.

-Foi un experimento moi raro. Tiven a oportunidade de compartir un curso na Facultade de Xornalismo con Basilio Martín Patino, unha das persoas que máis me influíron. Eu sempre me inspirei nos seus documentais e gustábame o feito de que xogase co límite da ficción e a realidade. Pero Naviegos, os outros arraianos foi a obra que marcou un antes e un despois na miña carreira. Doume conta de que ao final sempre acabo falando de ríos. As miñas debilidades son o Navia, o Nilo e o Amazonas. De feito, teño pendente facer unha historia en América, pero por circunstancias aínda non saíu.

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
3 votos
Comentarios

«Tiña o desexo de que os meus fillos coñeceran Etiopía, a súa terra natal»