Rodaxe de «La Casa de la Troya»

Equipo de rodaxe no Pazo de San Lourenzo en agosto de 1924


É unha das obras literarias en lingua española máis lidas de todos os tempos. Espallou polo mundo enteiro un tipo de vida singular: a dos estudantes na Compostela de finais do século XIX. A novela La Casa de la Troya de Alejandro Pérez Lugín (Madrid, 1870-A Coruña, 1926) publicouse por vez primeira en 1915 (Sucesores de Hernando, Madrid), cunha tiraxe de 1.600 exemplares, 448 páxinas e capa de Castelao. Quizais, a súa popularidade superou, en moito, a súa calidade literaria, pero Lugín soubo plasmar nestas páxinas ese mundo único de tunantes e ?chamémoslle? transgresión estudantil que, nunha pensión (hoxe, atractivo e concorrido museo), pasarían os días máis felices das súas vidas.

O éxito de La Casa de la Troya foi inmediato e abraiante. Dez anos despois da súa publicación, en 1925 ían xa vendidas trinta edicións. Algo insólito. O mundo lía, e lía a Casa de la Troya. (Hoxe, por certo, en 2016, son incontables as edicións ?superan con moito as cen? e os milleiros de exemplares vendidos en todo o mundo e varias linguas). Pero aqueles eran tempos tamén de ouro para o cine: o cine mudo. E así chegamos ao documento inédito que hoxe ilustra esta crónica gráfica. Grazas ao fotohistoriador Carlos Castelao, quen nos cedeu esta imaxe para que todos a poidamos contemplar en primicia.

Trátase da rodaxe, en agosto de 1924, da película La Casa de la Troya, que aquel verán de hai un século se estaba a gravar por distintos lugares de Galicia (Santiago, Os Ánxeles de Brión, Betanzos, Pontedeume, Sada, Vigo ou Combarro). Esta imaxe do equipo de rodaxe (19 integrantes), cos actores, actrices e equipo técnico, está tomada en Compostela, no barrio de San Lourenzo. No centro, Alejandro Pérez Lugín, o autor da novela e aquí tamén guionista, co-director xunto con Manuel Noriega e produtor (Troya Film) da película. Á súa dereita, con vestido branco, a protagonista, Carmen Viance (Madrid, 1905-1985), quen, con vinte anos, iniciaba por estes días de 1924 unha fulgurante carreira profesional que a ía converter axiña na primeira gran diva do cinema (mudo) español.

O filme estrearíase en 1925, en Madrid e Barcelona primeiro, simultaneamente, e logo, o 10 de febreiro, no Royalty de Santiago (despois xiraría pola Coruña e Vigo). Foi un dos grandes éxitos cinematográficos da época. Hoxe quedan copias na Filmoteca Nacional o no Centro Galego das Artes e a Imaxe (CGAI).

Tras esta película de 1925 virían outras, ata catro filmes máis sobre o famoso libro de Lugín, pero esta quédanos como a primeira («La película de todos, la que nunca se olvidará», como se anunciaba daquela). E con esta imaxe inédita que damos a coñecer hoxe, do grupo posando naquel inesquecible agosto... de hai 92 anos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos

Rodaxe de «La Casa de la Troya»