Queremos Galego reivindica de xeito inmediato seis das medidas do Plan de Normalización
17 may 2016 . Actualizado a las 14:53 h.O idioma é a vida. Baixo ese lema milleiros de persoas percorreron as rúas de Santiago no 17 de maio «polo dereito a vivirmos en galego». A marcha, que saíu da Alameda, contou coa asistencia da portavoz do BNG, Ana Pontón, Carlos Callón, candidato do BNG ás eleccións xerais, ou coa dos alcaldes de Santiago e Pontevedra, Martiño Noriega e Fernández Lores, respectivamente. Todos coincidiron en que o 17 é unha xornada de celebración, pero tamén de reivindicación.
O portavoz de Queremos Galego, Marcos Maceira, lamentou a actitude do Goberno galego, «que se caracteriza por acción ou omisión por atacar ao galego», e pediu que o goberno que saia das eleccións de outubro cumpra de primeiro seis das 400 medidas do Plan de Normalización que apoiou por unanimidade o Parlamento: garantir o ensino en galego, que o transporte público respecte a toponimia, que a administración pública permita o uso efectivo da lingua, un convenio coa radio televisión portuguesa, que a CRTVG sexa un axente de normalización, e finalmente que as axudas e subvencións estean subordinadas ao uso real da lingua.
Tamén Ana Pontón lembrou o orgullo da lingua propia, «que nos fai estar no mundo e nos abre as portas a unha das linguas máis faladas do mundo, aos países da lusofonía». A nacionalista denunciou a política de escrache do goberno de Feijoo «que pretendeu desafiuzar o galego do ensino». O vindeiro martes o BNG levará ao Parlamento unha moción para que a Xunta cumpra o que di o Consello de Europa respecto ás linguas minorizadas.
A marcha, nun ambiente festivo e baixo frases como Serei inmortal se TI me falas ou Sempre en Galiza, sempre en galego, rematou na praza da Quintana onde varias persoas recitaron A Fala, o poema de Manuel María, e tamén se leron unhas verbas da súa viúva, Saleta Goi. Houbo música da man de Mini e Mero para rematar coa lectura do manifesto a cargo do portavoz de Queremos Galego, Marcos Maceira, quen lembrou que «temos lingua propia e queremos vivir nela. Non é un capricho, é unha necesidade».