«Os veciños pídenme melloras en servizos, pero tamén traballo»

Dous anos tratando de «axudar aos padroneses e non crearlle máis problemas» déixanlle una «percepción boa»


padrón / la voz

Os dous primeiros anos de mandato do alcalde de Padrón (PP), Antonio Fernández Angueira (A Ponte, 1975), déixanlle unha «percepción boa pese a todos os obstáculos económicos». Quizais porque neste tempo, como sinala o propio rexedor, «tratamos de axudar aos veciños e non crearlle máis problemas».

-¿Que xestións destaca?

-Logramos desbloquear a obra da vía N-550 ao seu paso por A Ponte, logo de 16 anos de espera. Regulamos o mercado dominical e seguimos traballando na súa mellora, cobrando por primeira vez os recibos por transferencia bancaria, facendo un exercicio de transparencia. Estamos a xestionar o derrubamento do esqueleto dun edificio en A Trabanca e buscamos o financiamento para completar os fondos do 1 % cultural para a obra do xardín. Sen contar que ampliamos as actividades deportivas, culturais e de lecer e reducimos o remanente de tesourería negativo de menos 938.000 euros, tal e como o atopamos, a menos 159.000 euros no exercicio do 2012.

-¿Que é o prioritario para o que queda de mandato?

-Lograr máis e mellores servizos para o rural. O arranxo e peatonalización de rúas do casco histórico e continuar coa rehabilitación de edificios. Tamén o proxecto de posta en valor do noso potencial xacobeo, conseguindo a oficialidade do itinerario Santiago- Padrón.

-O Concello ten pendente novos contratos, como o do lixo. ¿Para cando?

-No caso do lixo estamos a xestionar un servizo básico que terá unha duración de oito anos e estamos mirando detidamente todo o proceso porque non queremos que haxa problemas como houbo co anterior.

-A diario ten veciños as portas da alcaldía. ¿Que é o que lle piden?

-Necesidades básicas, melloras en servizos e no adecentamento e limpeza de zonas, pero tamén un posto de traballo.

-¿Cal é a situación económica do Concello?

-É moito mellor que hai dous anos, a pesar de ter solicitado un préstamo de 500.000 euros obrigados polo plan de axuste para pagar facturas atrasadas dende hai máis dez anos. Pese a iso, logramos baixar o remanente de tesourería negativo en máis de 750.000 euros.

-¿Houbo recortes en servizos?

-Recortes non, en todo caso axustes para un mellor funcionamento.

-¿E despedimentos?

-Ningún. Houbo unha finalización de obra e servizo e tres xubilacións.

-¿Cal é o custo para os cidadáns das dedicacións do goberno local?

-En concreto, 41.898,16 euros menos ao ano que co anterior goberno.

-O Consorcio Terras de Iria, ¿quedouse nun gran anuncio ou vai funcionar realmente?

-Os tres concellos do Sar xa estamos funcionando de forma conxunta para lograr a eficiencia nos servizos e de cara a obter subvencións en beneficio da comarca. Destaca a consecución do Grupo de Emerxencias Supramunicipal (GES).

-¿Que percepción cre que hai na rúa do labor do goberno municipal nestes dous anos?

-Haberá opinións para todos os gustos e non o saberemos ata que o pobo se manifeste nas urnas. Só espero cumprir expectativas e aprender cada día para ter un concello mellor.

-Goberna coa tranquilidade que lle da unha oposición que non fai moito ruído. ¿Opina o mesmo?

-Non estarei tranquilo ata que o Concello teña un remanente de tesourería positivo.

antonio fernández angueira alcalde de padrón

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
6 votos

«Os veciños pídenme melloras en servizos, pero tamén traballo»