«A nosa pretensión é facer música de diferentes xéneros e estilos, enfocada a tódalas idades, dende nenos a maiores»
20 ene 2023 . Actualizado a las 17:39 h.É un pracer para mín estar hoxe aquí como presidenta e representante da Asociación Cultural da Orquestra Sinfónica de Pontevedra, para recibir este grandísimo recoñecemento.
Normalmente non teño por hábito levar papel, pero hoxe considereino moi necesario porque non quería deixarme a ninguén atrás.
Quería agradecer primeiro ao Excelentísimo Concello de Oontevedra, ao noso alcalde, Miguel Anxo fernández Lores, e á miña benquerida Carme Fouces, concelleira de Cultura.
Reitero sempre as miñas verbas: grazas!! porque sin o seu apoio e confianza nos nosos proxectos, a nosa evolución como orquestra non houbera sido posible.
Grazas tamén a tódolos membros do xurado, membros da corporación municipal e das forzas vivas da cidade, e ao noso público por propoñernos e elixirnos como candidatos a recibir este premio.
Somos unha asociación que naceu no ano 2006, na que un grupo de instrumentistas tiñamos afán por tocar e levar a nosa música por toda a cidade, e decidimos xuntar a máis músicos que tiveran as mesmas expectativas: integrarnos no contexto social, educativo, cultural e artístico de Pontevedra, e por extensión de toda Galicia.
E de súpeto, despois dun ano de ensaios, conseguimos facer o noso concerto de presentación en xuño de 2007. dende ese ano, todo foi in crescendo: actuamos polos diferentes auditorios de galiza, colaboramos con solistas de índole nacional e internacional, asociacións de música tradicional, coros, danza,… e ademais conseguimos crear canteira e somos xa tres orquestras: a orquestra infantil con nenos e nenas de 6 a 12 anos, a orquestra xove de 13 a 26, e a orquestra «dos maiores» como eles nos chaman, con músicos de tódalas idades, na que participan xa moitos rapaces da xove.
Pola asociación pasaron varios membros directivos, músicos galegos e extranxeiros que traballaron a prol da evolución da nosa asociación, sendo ademáis moitas as familias que confiaron no noso traballo dende o primeiro día, así que grazas tamén a todos eles, porque o premio é labor de todos.
A nosa pretensión é facer música de diferentes xéneros e estilos, enfocada a tódalas idades, dende nenos a maiores, e impulsar ademáis a perspectiva de xénero, unha iniciativa que pretende poñer nome a tódalas mulleres que hai detrás da música clásica, dende compositoras, a instrumentistas e directoras.
Éstes últimos días, a prensa preguntábame como acollíamos este premio, e a miña resposta era: de emoción e motivación total. Así é, … que cando Miguel Anxo Fernández Lores me chamou por teléfono, púxenme tan feliz que non o deixaba falar, pídolle as miñas máis sinceiras desculpas por tanta impulsividade .
Foron varias as ocasións nas que nós como músicos estabamos neste lado do escenario poñendo música a este acto, e mentres se facía a entrega dos premios a outras persoas e asociacións (sempre moi merecidos), eu pensaba: «Buff… oxalá algún día puidera estar eu ahí recollendo este premio». E o día chegou!! Así que, qué máis podo engadir: que estou feliz!!!!
E remato dándolle os meus parabéns a Maite pola súa traxectoria profesional e persoal, e por dar visibilidade ás aptitudes e actitudes deportivas de tantas mulleres ao longo destes anos.
Moitas Grazas!!!!!!