As mulleres do mar, protagonistas da campaña en TikTok da Memoria das Mulleres no seu novo vídeo
PONTEVEDRA CIUDAD
Sara Seco ofrece información e dá voz a un conxunto de traballadoras que o deron todo durante anos para sacar adiante ás súas familias
01 nov 2022 . Actualizado a las 12:09 h.A concellería de Patrimonio e Memoria Histórica de Pontevedra puxo en marcha o pasado mes de abril, dentro do programa A Memoria das Mulleres, un ciclo de creación e divulgación de pezas audiovisuais da man de tres creadoras galegas. Nesta ocasión, María Rúa, Helena López e Sara Seco foron as escollidas para divulgar as diferentes biografías de mulleres presentes na web dogrisaovioleta.gal.
O novo video deste ciclo audiovisual é obra de Sara Seco, que vén de publicar no seu TikTok un vídeo adicado ás mulleres do mar. Trátase dunha peza que combina e mestura a divulgación da man de testemuñas directas —varias traballadoras do mar relatan as condicións nas que traballaron de mozas— e de gastronomía —a tiktoker amosa como vai cociñando un produto extraído do mar—.
«A relación da muller co mar é de traballo, de vida e de infancias roubadas», comenta Seco no seu vídeo. «A elas correspondeulles facerse donas dos seus traballos, sen coberturas legais e sen limitacións horarias. Coa simple axuda dun caldeiro e dunhas botas saían faenar». Ao tempo que a creadora ofrece estas pílulas informativas, as propias mulleres que traballaron no mar dan a súa versión.
O vídeo está a gozar de bastante dentro da comunidade galega de TikTok, con case 12 mil reproducións en apenas un día desde a súa publicación, máis de dos mil ‘Gústames’ e decenas de comentarios subliñando a importancia destes traballos e do importante que é recuperar e subliñar o feito polas traballadoras.
Nado no ano 2013, da man do Concello de Pontevedra, o proxecto A memoria das mulleres ten como finalidade construír, de modo colectivo e cooperativo, un fondo documental, gráfico e audiovisual da historia das mulleres en Pontevedra.