Ao longo da semana, doce persoeiros da cultura conversarán en distintos puntos do casco urbano
19 jul 2022 . Actualizado a las 10:36 h.Co obxectivo de «visibilizar a normalidade do uso diario do galego a través de conversas con persoeiros de distintos ámbitos», este luns comeza a terceira edición do programa En3Vistas que impulsa a Concellaría de Normalización Lingüística de Pontevedra. Os dous primeiros invitados que dialogarán coa xornalista Susana Pedreira no Campiño de Santa María son os músicos Sés e Baiuca.
Xa o martes, tocaralle a quenda a Antía Otero e Dores Tembrás, ambas de Apiario, xunto con Ledicia Costas no cruzamento das rúas Peregrina e Daniel de la Sota, mentres que o mércores o protagonismo recaerá en Elena Ferro, titular da marca Eferro, e Jordí López, de Aí Falaches, na Ponte do Burgo. Pola súa banda, o 21 de xullo e nos Xardíns do Doutor Marescot estarán o científico e investigador Ángel Carracedo e a escritora e artista Loli Beloso.
A edición deste 2022 de En3Vistas rematará o venres, 22 de xullo, coa participación de tres coñecidos redeiros en Santa Clara: Nee Barros (@neeumatiko), María Rúa Rodríguez (@pradorua) e Eric do Pazo (@unrapatransquilo).
O día a día
Tal e como destacou Alberto Oubiña, concelleiro de Normalización Lingüística, aínda que «a lingua estará presente no programa, do que se trata é de coñecer o día a día destas persoas que dignifican o uso da lingua galega» a través dunha serie de diálogos que serán moderados por Susana Pedreira. De feito, esta iniciativa aposta por unha fusión de formatos, pola fusión de entrevista e diálogo a partir das 20 horas.
De igual modo, o feito de escoller os distintos espazos públicos de Pontevedra onde se celebrarán estas conversas non é anecdótica, senón que ten unha clara intención de amosar «a recuperación que se ten feito dos distintos lugares da cidade», destacaron dende o Concello.
En canto as temáticas que se abordarán nesta edición, e á vista dos persoeiros invitados, estas se circunscribirán a uns ámbitos moi concretos, como son a música, a literatura, o eido empresarial, a ciencia e a creatividade dixital. Proba da importancia que teñen as novas tecnoloxías nesta proposta cultural é o feito de que as conversas poderán seguirse en director a través da canle de Facebook de @pontevedrate, mentres que posteriormente estarán dispoñibles en Youtube (ponte.gal/en3vistas).