O Museo de Pontevedra visibiliza as creacións das artistas galegas

L. Penide PONTEVEDRA / LA VOZ

PONTEVEDRA CIUDAD

Ramón Leiro

A mostra recolle medio cento de pezas de vinte e cinco artistas vencelladas con Galicia

22 may 2022 . Actualizado a las 05:00 h.

Medio cento de obras de vinte e cinco artistas reflexionan ata o 10 de xullo no Museo de Pontevedra sobre as problemáticas que afectan ás mulleres, segundo referiron na súa inauguración as comisarias da mostra Yolanda Herranz e Celeste Garrido. Deste xeito, o corpo, a sexualidade, a violencia, as relacións de parella, os roles de xénero, a maternidade, os coidados e a dependencia, pero tamén a identidade, a cuestión interracial, a interculturalidade, as condicións laborais ou o tránsito do privado ao público exponse en 25 Voilà la femme.

Pero esta exposición é tamén unha invitación para percorrer os máis de 25 anos de historia dunha mostra centrada en cuestións de xénero que naceu o 8 de marzo de 1992 no Ateneo Santa Cecilia de Marín como unha necesidade de reivindicar a presenza das mulleres no ámbito da creación artística. Dende entón ata a actualidade a mostra contou coa participación de máis de 200 artistas vencelladas a Galicia.

A este respecto, o director do Museo, Xosé Manuel Rey, cualificou a exhibición como un altofalante que chama a atención e reivindica a mirada feminina no proceso de co-creación e transformación da realidade social. Deste xeito, dálle visibilidade á obra de artistas que naceron ou se formaron en Galicia: «Chega con dicir ao respecto que a inmensa maioría delas formáronse na Facultade de Belas Artes de Pontevedra e que, por tanto, teñen unha vinculación directa coa cidade e, en non poucos casos, con este Museo co que colaboraron en accións diversas».

A inauguración de 25 Voilà la femme é para as súas comisarias cumprir un desexo longamente ansiado. «Houbo unha evolución moi significativa dende os primeiros traballos en 1992 ata as últimas xeracións, cunha aposta claramente definida pola igualdade e o xénero. Queriamos que esa constancia se recollera no centro máis importante de Pontevedra e tamén nun catálogo de calidade, un documento que permanece e que conta cos críticos máis importantes do Estado», destacou Yolanda Herranz.

«Estase xerando unha conciencia social en torno á necesidade de estar visibilizadas. Non se nos pode esquecer, somos máis de media humanidade», engadiu, pola súa banda, Celeste Garrido.