Paulo Seoane: «A intelixencia artificial pode salvar vidas do acoso nas redes»

m.c. A CORUÑA / LA VOZA CORUÑA / LA VOZ

PONTEVEDRA CIUDAD

MARCOS MÍGUEZ

O enxeñeiro pontevedrés desenvolveu un modelo capaz de detectar intimidacións en comentarios de redes sociais

06 abr 2022 . Actualizado a las 09:46 h.

O enxeñeiro informático Paulo Seoane Davila (Pontevedra, 1999) gañou onte o premio ao mellor traballo de fin de grao da facultade de Elviña cun proxecto dirixido polo investigador do Citic Fidel Cacheda, que tiña por fin desenvolver un modelo de intelixencia artificial capaz de detectar ciberacoso en comentarios en redes sociais. O xurado valorou o proxecto por riba dos outros dous finalistas, centrados na mellora das emerxencias sanitarias e a xestión das granxas de gandería extensiva.

—Non se pode dicir que a intelixencia artificial non remedie a natural, ou a falta dela. Vostede sufriu ciberacoso?

—Eu non, pero teño amigos que si e pasárono mal. Hai moitas persoas que chegan a ter ansiedade, depresión ou problemas de autoestima, e podería terse evitado de contar cun mecanismo que bloquease a publicación automaticamente ao detectar o acoso.

—Por que elixiu este tema e non outro?

—Porque é un problema real que cada vez está máis estendido. Porque podemos salvar vidas. A idea é bonita e tecnicamente complexa porque o ordenador non sabe inglés ou francés. É un circuíto eléctrico que ten que ser quen de entender frases no seu contexto. Ese era o reto.

—Cómo o adestraron?

—Na segunda fase, con 20.000 publicacións de Instagram. O bo de traballar con comentarios é que son contidos comúns a todas as redes, Instagram, Twitter ou TikTok, e o que se faga pode ser usado por todas.

—Como distinguen a crítica do acoso?

—Distinguimos entre agresión, que pode ser unha descualificación puntual ou un comentario tipo «isto é unha m...», e acoso, onde xa aparecen insultos ou comentarios recorrentes.

—Unha vez desenvolvido o modelo, de que xeito tería que implantarse para aplicalo nas redes e que realmente funcionase como filtro?

—O máis rendible e interesante, porque podería beneficiar a todas, é que fose un servizo externo ás empresas. Calquera que tivera interese en detectar e eliminar o ciberacoso nos comentarios podería contratalo. Da outra forma, se unha compañía compra a tecnoloxía quedan as outras sen ela.