Trátase dunha obra escultórica realizada polo canteiro Manuel Collazo Torres e impulsada pola Asociación de Veciños O Chedeiro
12 oct 2021 . Actualizado a las 12:03 h.A concelleira de Turismo, Yoya Blanco, achegouse até o atrio da igrexa de Cerponzóns para inaugurar o Marco de Perre, unha obra escultórica realizada polo canteiro Manuel Collazo Torres e impulsada pola Asociación de Veciños O Chedeiro dentro dun proxecto para que os topónimos da parroquia non caian no esquecemento e poidan incorporarse ao noso patrimonio cultural. No acto tamén participaron un nutrido grupo de veciños e os concelleiros Marcos Rey, Pilar Comesaña e Martín Martínez.
A instalación deste fito ou marco (pedra cavada no chan para sinalar os lindes dun terreo ou á beira dunha estrada para indicar lugares e distancias, ou ben momentos ou feitos importantes) foi posible grazas á colaboración do Servizo de Normalización Lingüística do Concello de Pontevedra, que axudou a recuperar os antigos nomes dos lugares da parroquia.
O Marco de Perre é un proxecto que comezou hai dous anos da man do canteiro Manuel Collazo e que se enmarca nas accións desenvolvidas polo colectivo O Chedeiro para defender e dar a coñecer o patrimonio cultural de Cerponzóns, entre as que se inclúen a instalación de dous cruceiros, a realización dun documental, a edición dun libro sobre a historia da parroquia, diversas charlas impartidas durante a celebración do milenio, a colocación de unha réplica do Miliario de Maxencio, a colocación de un fito informativo ao carón do Miliario e a colaboración coa Concellería de Turismo nun proxecto relacionado co Camiño Portugués denominado O Camiño Contado.
Deste xeito, O Chedeiro recolleu a testemuña deixada desde 1997 polo antigo cura da parroquia, Manuel Míguez, que comezaba a publicar nese ano na Voz de Rons a historia de Cerponzóns, un gran labor de investigación efectuada durante anos e que deixou unha herdanza de incalculable valor. Nun dos capítulos publicados, Míguez facía precisamente referencia a algúns nomes de pequenos lugares practicamente desaparecidos e englobados baixo denominacións máis amplas: A Cachada Vella, A Cañota, A Chan do Monte, A Cruciña de Ponte Beán, A Ponte Beán, A Ponte Pomar, Bigaixo, Cachadiña, Campo, Casa Nova de Liborei, Casás de Meán, Castelo de Cerponzóns, Cernadelo, Igrexa, Laxe de Bascuas, Liviáns, Mendo, Mogos, Mouchos de Meán, O Cimbelo, O Taral, Porrelo, Pozo de Meán, Río da Barca, Santarandán, Soutelo de Meán e Soutelo do Bravo (usándose os nomes de O Castrado, Liborei, San Caetano, Balea, A Fonteiriña, Pidre, O Vigario, O Bravo, A Costa, Meán, A Bouz, Tilve, A Rons, A Ermida e O Cunchido).