Na procura de espazos de socialización en lingua galega no campus de Pontevedra
PONTEVEDRA CIUDAD
Máis dun centenar de alumnos sumáronse ao programa Falamos no seu primeiro ano
07 may 2021 . Actualizado a las 05:00 h.Foi no ano 2018 cando dende a Área de Normalización Lingüística da UVigo se detectou unha presenza escasa do emprego do galego entre a comunidade universitaria de Pontevedra. A raíz de constatar esta eiva lingüística no campus, e en colaboración do Concello, apostouse por poñer en marcha unha iniciativa coa que crear espazos de socialización entre alumnos galegofalantes e aqueles que quixeran achegarse á lingua galega.
Foi así que naceu Falamos, un programa de dinamización lingüística que procura «normalizar» o emprego do idioma propio e atraer á mocidade a través de actividades novidosas, vencelladas sobre todo á eido cultural.
Fernando Ramallo é o director da Área de Normalización Lingüística da UVigo e sociolingüista galego experto en neofalantes, e tras un ano da posta en marcha desta iniciativa explica que «pese a que a pandemia impediu que levaramos a cabo todas as actividades que nos gustaría, estamos satisfeitos co seu resultado e podemos dicir que xa está consolidado».
Neste senso, Ramallo comenta que «o uso do galego entre a poboación de 16 e 25 anos é escaso. Somos conscientes de que esta realidade non imos mudala cun programa destas características, pero si podemos contribuír a paliar esta eiva e atraer á mocidade á súa práctica nas súas relacións sociais».
No seu primeiro ano de vida, máis dun centenar de alumnos pontevedreses apuntáronse ás actividades programadas no marco de Falamos, entre as que destacan o club de lectura, os visionados de filmes e o voluntariado lingüístico, no que durante tres semanas os alumnos xúntanse por parellas para conversar en galego sobre temas de actualidade.
«Facerse galegofalante activo, sobre todo nas relacións sociais, é complicado para moitos e nós queremos transformar un pouco esta realidade. Porque o certo é que estamos ante unha xeración con moi boas competencias en galego e que rematan a escolarización cun bo dominio do idioma», apuntou Ramallo.
Pola súa banda, o concelleiro de Normalización Lingüística, Alberte Oubiña, destacou que «tendo en conta este contexto de pandemia, a verdade é que estamos satisfeitos cos resultados, pois era a primeira vez que se poñía en marcha unha iniciativa así e a participación foi boa. Agardamos que no vindeiro curso poidamos levar a cabo moitas máis actividades».