O circo que se pasou ao galego e que loita contra a contaminación no mar

Chega a Pontevedra co seu espectáculo Oceánika, onde nenos e maiores descubrirán o que hai no fondo mariño


pontevedra / la voz

Aos nenos, polo menos aos que ven a televisión, sóenlles facer de cando en vez unha pregunta que di así «¿Quién vive en la piña debajo del mar?». Si. Trátase da sintonía coa que se inicia o incombustible Bob Esponja, que sigue vivo e coleando despois de entreter xa a varias xeracións. Pero os nenos, como persoas pequenas pero listas que son, saben que hoxe en día, desafortunadamente, debaixo do mar non viven soamente seres divertidos, algas e animais de cores. Seguramente, todos, na casa ou na escola, oíron falar xa dese pesadelo que é a contaminación mariña; o feito de que os plásticos estean a ensuciar tanto os océanos. E por aí, precisamente, vai o espectáculo dun singular circo que volve estar de visita en Pontevedra. Trae ate a capital do Lérez -e despois levarao tamén a Vigo- un espectáculo chamado Oceánika, que é toda una declaración de intencións. Abofé que si.

O circo que pon en escena Oceánika chámase Evolution. E deseñou este espectáculo pensando en dúas cousas: quería facelo en galego, porque cre que unha terra que tan ben tratou sempre os números deste circo merece un show na súa lingua nai, e quería tamén que levase unha mensaxe reivindicativa, que fose un berro contra a contaminación. Todo iso, por descontado, sen perder a esencia do circo. Cativos e maiores atoparán nas funcións aos artistas clásicos, desde pallasos a malabaristas pasando por equilibristas, pero descubrirán tamén que é o que está a pasar no fondo do mar.

Onte, os artistas do Evolution e os técnicos estaban ensaiando. Entre exercicio e exercicio, cos aros ou entre decorados de peixes e corais, contaban a súa historia. O circo naceu da man dunha familia. Pero hai tempo que conta con moitos artistas contratados que ora van coas caravanas ora dormen en hoteis. O representante de todos eles, e do Evolution en si, é Luis Vila, un rapaz que é o vivo exemplo de como cambiaron as cousas nos circos. El ten 22 anos e está a estudar dúas carreiras da rama económica en A Coruña. Pero, a maiores, traballa por toda Galicia como representante do circo. Parece mago para dar feito tal cousa.

 Entradas a metade de prezo no Oferplan 

O circo Evolution, co espectáculo Oceánika, vai estar tres semanas en Pontevedra. A primeira función terá lugar hoxe ás sete da tarde. Poden comprarse entradas de forma anticipada a través da plataforma Oferplan. Neste portal, os billetes teñen un desconto do 53 %, custan só 7 euros fronte aos 15 da billeteira.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

O circo que se pasou ao galego e que loita contra a contaminación no mar