O compromiso


Decano de Belas Artes

Existe un antes e un despois a partir da creación de Belas Artes en Pontevedra. Porque sen esta facultade que a Universidade de Vigo radicou na Boa Vila nada sería igual en Pontevedra. E, por certo, tampouco na Galiza, que até ese momento (xustamente fará o ano que vén 30 anos do seu nacemento) aínda carecía dunha facultade de Belas Artes no país. Todos os medidores socioculturais e, tamén, a cidadanía acreditan en que Belas Artes é, xunto co Museo de Pontevedra, a institución cultural radicada na cidade máis coñecida e recoñecida polos seus concidadáns.

Ademais, neste contexto salienta a inmensa proxección exterior da nosa facultade. Se no pasado foron as Bienais de Arte as que situaron no mapa da arte contemporánea a cidade de Pontevedra, agora é o nome da nosa facultade en maridaxe coa cidade do Lérez, as que exportan e proxectan a ambas en museos, centros de arte e certames internacionais. Todo o cal, por certo, énchenos de orgullo e fondo agradecemento, mais tamén nos obriga a un maior compromiso.

Mais coidamos, en fin, que aínda queda moito por facer nesa complicidade entre a facultade e as institucións galegas. Resulta, por exemplo, en extremo paradoxal que nas moitas intervencións urbanas levadas a cabo no tecido urbanístico de Pontevedra, pero tamén en Galiza en xeral, aínda non se contou desde as institucións públicas cos estudantes, egresados ou profesorado da facultade. Sen dúbida, desde o coñecemento profundo que acreditamos na contemporaneidade artística, podemos contribuír á conexión entre a arte contemporánea e o urbanismo das cidades e vilas galegas.

Cómpre, pois, que abramos liñas de colaboración cos poderes públicos locais e provinciais, xerando concursos abertos de ideas nos que desde, entre outros eidos o muralismo ou a escultura, por exemplo, este sementeiro de creación contemporánea que é a nosa facultade faga posible xermolar producións plásticas a pé de rúa. E todo iso porque cremos que a cultura e a arte contemporánea farán de Galiza, sen dúbida, un país aínda mellor para as galegas e galegos, mais tamén para os seus moitos visitantes.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

O compromiso