Culturgal xa pensa na edición do 2017

Preto de quince mil persoas achegáronse este fin de semana ao recinto feiral


Pontevedra / La voz

O Culturgal volverá o vindeiro ano a Pontevedra e, de novo, o fará na primeira fin de semana do mes de decembro. Así, o confirmou onte a organización da Feira das Industrias Culturais de Galicia: «O equipo xa ten a cabeza no 2017 para celebrar o décimo Culturgal, que terá lugar do 1 ao 3 de decembro no Pazo da Cultura».

O presidente do certame, Manuel Bragado, destacou que é evento «consolidado e establecido no calendario». Non deixou pasar a ocasión de apuntar a súa «utilidade social no que está testada a alianza entre industria, institucións e públicos e na que se mostran formatos e fórmulas colaborativas entre diferentes axentes».

Proba do interese que esperta entre o público é o feito de que nesta novena edición, organizada baixo o lema de Cultura, comunidade, futuro, estimouse que unhas quince mil persoas acudiron ao recinto feiral de Pontevedra. Trátase dunha cifra moi semellante á que se rexistrou o pasado ano.

Neste sentido, a organización resaltou que xa quedaron atrás as etapas de lanzamento e consolidación: «Xa podemos dicir que hai nenos que creceron co Culturgal», salientou Bragado. Polo tanto, a feira adéntrase nunha sorte de idade adulta na que, segundo confirmou o presidente da mesma, terá que afrontar novos retos. «Estamos convencidos da necesidade de abrir e proxectar Culturgal fóra, interactuar con outros ámbitos e debuxar novos horizontes. Desde Pontevedra, cidade na que esta feira medrou e consolidouse, sentímonos e percibímonos como unha comunidade».

Na xornada de clausura, entre as actividades programadas, as presentacións de Sicixia, o novo proxecto cinematográfico de Ignacio Villar, director de A esmorga, e da tradución ao galego que fixo Xesús Fraga, xornalista de La Voz de Galicia, de Un monstro vén a verme, obra de Patrick Ness.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Culturgal xa pensa na edición do 2017