Pontevedra celebra a gran festa da cultura galega

Oitenta expositores e entidades encherán a partir de mañá a feira de Culturgal con 150 propostas e actividades

Culturgal terá este ano unha nova distribución espacial dos stands para mellorar a visibilidade dos produtos e a circulación do público
Culturgal terá este ano unha nova distribución espacial dos stands para mellorar a visibilidade dos produtos e a circulación do público

Pontevedra / La Voz

Comezou a conta atrás para o arranque de Culturgal, a Feira das Industrias Culturais de Galicia, que durante tres días, desde mañá venres ate o domingo, ofrecerá case 150 actividades dirixidas a un público do máis diverso: infantil, familiar, interesado en propostas concretas e profesional...

A palabra será o eixo transversal de toda a programación, repartida nun cento de stands e outros espazos de divulgación das distintas expresións artísticas, literatura, escena, música, cine, arte e as novas tecnoloxías.

Esta é a oitava edición do maior escaparate da cultura galega, no que se dan cita anualmente ao redor de 15.000 persoas e que desta volta promete ser a máis participativa de todas as celebradas ata agora, ata o punto de que o recinto feiral de Pontevedra empeza a quedarse pequeno ante a grande demanda de expositores, que este ano rexistrou un incremento do 25 %, cun total de 81 entidades culturais presentes.

Por ese motivo, e para incrementar a visibilidade de todos os produtos que se van expoñer, a feira estreará un novo deseño de distribución espacial, cun recorrido circular con pequenas illas para facilitar o acceso e tránsito do público sen as aglomeracións que se formaban antes no corredor central e sen as interferencias acústicas entre espectáculos e presentacións.

O compromiso dos organizadores é manter altos estándares de calidade e para elo o papel do público e a súa resposta positiva ante a introdución da entrada de pago na edición do 2014 é síntoma do futuro da feira. Nesta edición do 2015 mantéñense os prezos populares de acceso: 2 euros para adultos e 1 euro para menores de 3 a 12 anos.

Venres

Conto do Polbo Octavio. Cos seus ocorrentes diálogos e seguindo as ilustracións do conto de Francesca Chessa, publicado por Oqo Editora, os participantes aprenderán sobre a ecoloxía dos cefalópodos coa científica Luísa Martínez e varios monicreques.

Encontro con Formig4s.Encontro cos autores da serie Formig4s, de Xerais, Pere Tobaruela e Andrés Mexide. Idade recomendada entre 10 e 12 anos. Actividade concertada cos centros escolares interesados.

A cociñeira defunta. A escritora Ledicia Costas falará cos nenos do seu libro Escarlatina, a cociñeira defunta, unha aventura con mortos e vivos e cun receitario de medo, con propostas doadas, divertidas e terroríficas.

Sábado

O recuncho do ebook.Culturgal dedicará un espazo ao libro electrónico galego coa participación de varias editoriais e as novidades do sector neste formato.

Sesión científica co CSIC.

Unha sesión matutina dobre do CISC Galicia con propostas de diversión científica. Mini-obradorio ao redor da neurociencia, matemáticas, astronomía, física e ciencias do mar.

A Gramola Gominola. Concerto de Sonárbore. Un traballo novidoso no que se fai un repaso ao amplo abano de estilos musicais, desde o rock ao reggae, pasando polo blues, o ska, o heavy metal e mesmo o punk.

Recital Poético. A boca da terra de Manuel Rivas (Xerais) será obxecto dun recital poético. Poesía de natureza insurxente, ofrecida ao público con recitado de autor.

domingo

Coro Cantigas da Terra.Voces, instrumentos, baile e teatro autóctonos. Un paisaxe emocional e un traballo de recuperación cultural para un coro centenario, fundado en A Coruña.

Encontro de novela negra. Conducido pola xornalista Montse Dopico, o encontro coa novela negra conta coa participación de Héctor Carré, Antonio Tizón, Diego Ameixeiras e Xaquín Fernández Leiceaga.

Miniserie «Vento Ferido». Proxecto audiovisual que recolle os relatos do libro de Carlos Casares do mesmo título. Con Miguel Grandío, director, Sara Varela, produtora, Nerea Sarmiento, guionista, e Paulino Pérez, produtor executivo.

Xornadas Firma e Filme. Posta en valor de dous eidos creativos da cultura galegas, o das imaxes e o das letras, a través dun proxecto conxunto que contribúa á adaptación das obras literarias ao audiovisual.

Tercer Maratón de Webseries Culturgal

Sábado?? 16 horas

O programa de Culturgal dedicado ao sector do audiovisual inclúe numerosas presentacións e proxeccións de documentais, longametraxes e miniseries, acompañadas de coloquios que se desenvolverán ao longo dos tres días que dura a feira.

Entre as propostas figura o terceiro Maratón de Webseries Culturgal, que arrancará o sábado ás catro da tarde e no que se exhibirán un total de seis títulos. O primeiro será PIB, con Héctor Casas e Alfonso Míguez, coprodutores, guionistas e protagonistas, e Alba María Gómez, directora de arte. Seguiranlle Gafas e pallado, dirixida por Perico González Balado, El Método sueco, Haters, de Miguel Barros, Pink, tamén de Miguel Barros, e Dalle Jas, de Tegüi Sagüillo.

En Culturgal tamén se proxectará a longametraxe Las altas presiones, de Ángel Santos, producida por Matriuska.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Pontevedra celebra a gran festa da cultura galega