O club aposta por manter o bloque, con catro ou cinco reforzos e subindo os tres xogadores que rematan a súa formación no plantel xuvenil celeste
04 jun 2014 . Actualizado a las 06:54 h.A directiva do Vilalonga acordou na noite do luns a contratación de Óscar García coma substituto do nicrariense Julián Ferreiro á fronte do banquiño celeste a vindeira tempada. Un relevo que chega do veciño Xuventú Sanxenxo, cuxas dúas últimas e exitosas campañas levaron os responsables do club do Novo San Pedro a contactar a semana pasada con García para tratar a súa contratación, co técnico tendo anunciado xa dúas semanas atrás a súa decisión de non continuar no banquiño do Sanxenxo.
Un equipo este último ao que deixou á beira do ascenso hai un ano, quinto a só 2 puntos do regreso á Terceira ao non ser quen de gañar o seu derradeiro partido de Liga, saldado cun empate. Hai catro semanas que o Xuventú Sanxenxo se quitou a espiña coma subcampión da Preferente Sur.
Óscar García (Moaña, 27 de maio de 1974), xogador de Terceira e de Preferente no Alondras, no Rápido de Bouzas, no Pontevedra B e no Cruceiro do Hío, dirixirá o seu terceiro equipo tras catro tempadas no Cruceiro e no Sanxenxo. «El objetivo será intentar ascender. Es muy complicado, pero me atrae el reto», comenta.
A intención do técnico, que vén acompañado de Toño, o seu preparador físico no Sanxenxo, é manter a súa aposta por un fútbol «de ataque, dinámico y rápido», sobre a base do actual plantel celeste, con catro ou con cinco reforzos e contando cos tres xuvenís que se licenzan da canteira.