Sentida lembranza e reivindicación na homenaxe a Bóveda

«A única esperanza dos asasinados é que algún día a democracia que ía vir os ía homenaxear», afirmou o seu neto


pontevedra / la voz

Hai vinte e tres anos, en 1996, levantábase na Caeira (Poio) o Monumento a Alexandre Bóveda (1903-1936). Dende entón cada 17 de agosto celebrase nese lugar un dos actos centrais do Día da Galiza Mártir. Este sábado cumpríanse 83 anos do asasinato do político e intelectual galeguista que xogou un papel activo na redacción do Estatuto de Autonomía.

No acto institucional deronse cita membros da familia Bóveda, das Fundacións Alexandre Bóveda e Castelao, da Asociación Viguesa da Memoria Histórica do 36 e das corporacións municipais de Pontevedra e Poio cos seus alcaldes á cabeza. A concelleira de Poio Marga Caldas exerceu como mestra de cerimonias. «Hoxe é un día de lembranzas, de memoria e de recuperación», dixo. Tivo un recoñecemento especial para as mulleres das vítimas do alzamento. A pesar do paso do tempo, non faltou a emoción. Marga Caldas leu parte da carta de despedida dun Bóveda xa sentenzado, na que «o voso Xandro» se despedía de Amalia Álvarez, a súa muller, e dos seus fillos. «Todos estaredes sempre na miña lembranza».

O presidente da Fundación Castelao, Carlos Mella, lembrou o traballo polo que Bóveda deixou a súa vida e lanzou un desexo: «Fagamos un esforzo para que cada un dos que estamos aquí sexamos mellores galegos». Xente con bolsas do súper que recorre sorprendida a costa da Caeira e a serea dun camión de bombeiros fan un pequeno alto nos discursos. Tras Mella interveu Telmo Comesaña, presidente da Asociación Viguesa pola Memoria Histórico do 36 e gañador do XIV Premio de Poesía Día da Galiza Mártir.

Valentín García Bóveda, neto do galeguista, agradeceu a «presenza plural» no acto -tamén había concelleiros do PSOE e PP de Pontevedra e de Poio- e lembrou o por que de citarse no Monumento da Caeira. «As veces pérdese a perspectiva de por que facemos as cousas. A única esperanza que tiñan os asasinados é que algún día a democracia que ía vir os ía homenaxear». Amalia Bóveda, filla do fundador do Partido Galeguista, toma a palabra. Lembra que as claves están atrás, que hai que saber ler con xenerosidade e que «loitar por separado é unha forma de insomnio».

O alcalde de Poio, Luciano Sobral, pecha as intervencións antes da ofrenda floral e o himno galego. Moi emocionado, o rexedor di que Bóveda era novo cando lle arrebataron a súa vida. Algúns dos que recolleron o seu legado non están, apuntou Sobral, que se despediu cunha viñeta de Castelao: «Os que mataron a Bóveda mataron unha Galiza chega de luz, pero nós crearemos outra e entón Bóveda revivirá».

Ao acto asistiu a portavoz nacional do BNG, Ana Pontón, que pediu institucionalizar o 17 de agosto Día da Galiza Mártir para reparar a memoria de Bóveda e de todas as vítimas do franquismo. Criticou a nula achega do Goberno de Feijoo para políticas de recuperación da memoria histórica fronte ás axudas á familia Franco para converter o pazo de Meirás «nun centro de apoloxía franquista». Tamén acudiron Antón Sánchez, de Anova, e Pancho Casal, de En Marea.

Acto institucional. O Monumento a Alexandre Bóveda acolleu pola mañá o acto institucional coa ofrenda floral e a interpretación do himno galego. Estiveron presentes membros da familia Bóveda, de fundacións e asociacións e políticos. foto claudia gómez

Entrega do premio de poesía. Tralo xantar organizado pola Fundación Alexandre Bóveda, tivo lugar pola tarde no parque que leva o nome de Amalia Álvarez, muller do galeguista, a entrega do premio de poesía Día da Galiza Mártir a Telmo Comesaña. foto claudia gómez

Acto político do BNG. A celebración do Día da Galiza Mártir pechouse cun acto do BNG en Curros Enríquez ao que asistiu a portavoz nacional, Ana Pontón. Antes tivo lugar na capela e no cemiterio de San Amaro unha misa e unha ofrenda cívica. foto claudia gómez

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
24 votos
Comentarios

Sentida lembranza e reivindicación na homenaxe a Bóveda