Paula Romero: «O noso espírito é facer o que nos apetece»

A cantante deixa claro que «temos un humor ácido e feminista que nos fai sentir orgullosas»


«Precisamente, que sexa o Día da Matria para nós é importante. A escolla de De Vacas para ese día non é aleatoria e iso fainos sentir orgullosas», sinala Paula Romero, A Morena de De Vacas, grupo que mañá (21.30 horas) pechará en Poio os actos programados por esta efeméride no parque de Ferreirós.

-Moitas das súas letras teñen unha compoñente altamente reivindicativa moi apropiada para esta data, ¿non?

-Si. A esencia do grupo parte un pouco diso, de facer cousas que moitas veces se consideran irreverentes ou, incluso, inapropiadas. O noso espírito é facer o que nos apetece e, sobre todo, contar cousas que moitas veces non se contan e que cremos que nun escenario son benvidas.

-¿O politicamente correcto está matando a cultura?

-Non so a cultura, está matando calquera tema. De Vacas pode falar da menstruación, de algo do que non se falou nunca, ou pode empregar a retranca extrema para falar de calquera tema ou criticar aquela subvención de Enrique Iglesias de Turgalicia de trescentos mil euros para gravar o seu videoclip en Galicia.

-¿Como xurde De Vacas?

-Xurde dunha tarde de conversas hai catro anos. Inés [Salvado], Faia [Díaz] e mais eu cantábamos xuntas nun coro e empezamos a recordar a nosa adolescencia con moitas risas. Lembrámonos do moitísimo que nos gustaban as Spice Girls e recordábamos absolutamente todo, que tiñamos unha memoria histórica das súas coreografías e das súas letras impresionante, polo que había que facer algo con iso. A idea, en principio, era facer temas das Spice Girls e temos varios no noso repertorio, pero tamén conservar o guachinei, esa lingua en inglés que falabamos cando eramos pequenas e que inda queremos conservar viva como lingua minorizada.

-Moita xente pregúntase para cando o primeiro traballo discográfico de De Vacas.

-É algo que nos preguntan moito. Antes dicíamos que non tíñamos pensado gravalo e agora dicimos que polo de agora non, pero non descartamos facelo. A nosa idea era ir sacando temas acompañados de pequenos vídeos, pero, sobre todo, tocar nos concertos, que é o que máis nos gusta facer. A resposta é que por agora non pero nunca se sabe.

-¿E si lle pregunto por unha canción da que se sinta especialmente orgullosa?

-A verdade é que temos moitas favoritas. Gústame moito a que facemos, precisamente, de Enrique Iglesias. Fixémola en galego a ver si o alcalde de Miami, como el é de alí, pagábanos a nós. De momento, estamos esperando e nunca se sabe. É un tema do que me sento orgullosa que leva á xente a un punto moi bonito de festa. Contamos a historia de unha de nós que coñece a Quique persoalmente.

-Retomando ao concerto de mañá, ¿como son as actuacións de De Vacas?

-Gústame explicalo a través do que nos di a xente cando remata o concerto. Normalmente, din que pasaron un rato moi divertido, que lles sorprende o noso directo, que nada ten que ver cos nosos vídeos, que é un momento moi distendido e que, dende logo, temos moito morro e facemos o que nos da a gana. Temos un humor ácido e feminista que nos fai sentir orgullosas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Paula Romero: «O noso espírito é facer o que nos apetece»