Hadrián Jamardo, de O Garaxe Hermético a ser recoñecido como talento emerxente
PONTEVEDRA
Natural de Caldas de Reis, recibiu a «Bolsa Ensaia» que lle permitirá continuar co seu proxecto de BN titulado «No cine»
11 mar 2026 . Actualizado a las 15:02 h.Como recolle a súa páxina web, a Bolsa Ensaia «non é un premio nin un concurso», senón que o seu propósito «é apoiar a persoas que buscan facer unha traxectoria que impacta positivamente en Galicia». Deste xeito, cada ano, «a comunidade de persoas —denominadas pingas— doan voluntaria, anónima e independentemente cartos para facer posible» esta iniciativa que xa alcanzou as cinco edicións e que outorga unha bolsa de 10.000 euros para impulsar a traxectoria dunha persoa que impacta en Galicia. En total, máis de 250 persoas doan anualmente 60 euros que se destinan «integramente a evitar a fuga do talento xuvenil de Galicia».
Nunha recente gala desvelouse que o destinatario deste proxecto non foi outro que Hadrián Jamardo (Caldas de Reis, 1997), antigo alumno de O Garaxe Hermético de Pontevedra. De feito, o equipo de mestres deste centro formativo recoñeceron, a través de Kiko da Silva, estar «moi orgullosos do noso exalumno do Curso Profesional de Banda Deseñada», ao tempo que se congratularon de que esta cantidade permitiralle a Hadrián Jamardo continuar a desenvolver un proxecto de cómic que comezou no se último ano de estadía en O Garaxe Hermético e que se titula No cine.
Esta banda deseñada foi recoñecida co premio de fin de curso 2024 nesta escola profesional de cómic e ilustración, a primeira que se constituíu en Galicia, galardón que Hadrián Jamardo compartiu entón ex aequo con Alba Chan, que firmou Té de Lavanda. Dáse a circunstancia de que, un ano antes, ambos lograrán sendas Plumas de Ouro, ano, o 2023, no que o artista de Caldas de Reis, ademais, resultou finalista nos Premios Curuxa Nova que outorga o Museo do Humor Xaquín Marín de Fene.
Con No cine, Jamardo «explora a necesidade humana de evasión a través da arte, contrapoñendo a aceleración social urbana coa vida analóxica do noso rural», destacou Kiko da Silva, quen se mostrou convencido de que «por cousas como esta —o recoñecemento coa Bolsa Ensaia— mereceu a pena montar O Garaxe Hermético (...) hai catorce 14 anos».
Proxectos de BD
«Con moita emoción e ilusión. Foi unha gala moi guai. Sigo un pouco nunha nube dende entón. Era a terceira vez que me presentaba», recoñecía este luns Hadrián Jamardo, quen destacou que «grazas a isto poderei dedicarlle ben de tempo a un proxecto que lle tiña moitas ganas e, sobre todo, poderei facelo dende aquí, sen preocuparme tanto por onde vendelo e demais. É un privilexio», engadiu. Neste sentido, precisou que tiña parado No cine dende que deixou O Garaxe Hermético: «Agora parece que por fin vai poder saír adiante con calma e ben pensadiño».
Non é o único proxecto que ten en marcha, toda vez que neste 2026, «se todo vai ben, debería saír o meu primeiro proxecto máis longo, Tixoliño, un cómic máis xuvenil», así como participa no novo volume do recopilatorio Vinyetaria da barcelonesa Editorial Finestres cunha «pequena historia sobre a vivenda que fixen hai algún tempo e que gañou algunha cousiña».
Hadrián Jamardo ten claro que o seu paso por O Garaxe Hermético lle supuxo «a oportunidade de poder formarme nun campo que, a priori, eu pensaba que era sempre autodidacta». Así, ademais de comprobar que «había un camiño con persoas profesionais que te podían axudar», este autor recoñece que «o que máis estou agradecendo a posteriori é todo o tema da formación en tema de dereitos de autor, en tema de contratos editoriais, que é algo que, ao principio, sempre se peca moito de descoñecemento».
Neste punto, confesa que esta formación permítelle que, «a pesar de levar moi pouquiño intentado dedicarme a isto, xa teño unha base que me axuda moito e que me permite ter unha guía de cara onde ir, de cousas a aceptar, de cousas que me corresponderían por dereitos de autor, cousas que moitas veces, ao principio, non se valoran tanto porque vas coa ilusión de estar empezando. Creo que nese punto é onde máis me marcou, xunto con todo o que aprendín de debuxar e de escribir».