Ponteatro regresa o 10 de outubro cunha selección de seis obras galegas 

Pontevedra volve a vivir o teatro da man do ciclo Ponteatro, que terá lugar entre o 10 de outubro e o 21 de novembro. O concelleiro de Cultura, Demetrio Gómez Xunqueira (BNG), destacou na presentación do programa que están previstas seis representacións, cinco delas no Principal e unha, por cuestión de escenografía e montaxe, no auditorio do Pazo de Cultura.

Vai ser, apuntou Gómez, «un percorrido polo mellor do teatro galego. Gustaríanos ter máis xoves no ano para poder traer aínda máis, pero cremos que é un bo panorama do teatro galego e o seu compromiso coa actualidade do país».

Neste senso, o concelleiro salientou non só a calidade dos espectáculos senón o compromiso do teatro galego de tratar temas de actualidade e comprometidos. por exemplo, DeseXo de Talía Teatro (xoves 10 de outubro), achega unha reflexión sobre como é a nosa educación sexual; e O único que verdadeiramente quixen toda a vida é ser delgada, de ButacaZero (17 de outubro) fai unha reflexión sobre a esixencia do modelo de beleza das mulleres.

A peza Noso, de Os náufragos (31 de outubro), trata un tema de absoluta actualidade en Galicia que é o espolio eólico que está a sufrir o país.

En canto a O dragón de ouro, que porá en escena a compañía Sarabela teatro (7 de novembro), reflexiona sobre a situación da precariedade laboral e dos inmigrantes. E a peza que presenta Contraproduccións teatro, Entrega en man (21 de novembro), xira arredor do racismo e a violencia cun texto traducido e dirección de Cándido Pazó que é garantía de éxito.

Centro Dramático Galego

A sexta peza da programación, a única que vaise representar no Pazo e nun sábado (2 de novembro) e non un xoves coma o resto, é Terceiro Acto, posta en escena polo Centro Dramático Galego, que versa sobre unha troupe de actrices e actores veteranos que reúnese clandestinamente pola noite para emprenderen a que, quizais, sexa a súa última aventura xuntos.

As entradas están xa á venda en Ataquilla.com a prezos moi populares: os abonos para a 6 funcións a un prezo de 30 euros e as entradas para cada espectáculo a prezos de 8 euros, con descontos do 50 % para persoas desempregadas, maiores de 65 e estudantes. Todas as funcións están programadas para as 21 horas.

Ademais, haberá pases concertados con centros escolares de Secundaria e Bacharelato

---

---

---