A visión da Guerra Civil dos coetáneos de Castelao, nova mostra permanente do Museo

PONTEVEDRA

CAPOTILLO

A sala exhibe 14 pezas, entre elas «Bombardeo», que en 1937 exhibiuse xunto ao «Guernica»

20 jun 2021 . Actualizado a las 05:00 h.

Dende este xoves, o Museo de Pontevedra ampliou a súa oferta dentro da colección permanente cunha instalación con artistas coetáneos a Castelao para completar a súa visión da Guerra Civil e o exilio. Deste xeito, búscase «unha visión máis global do impacto que a guerra e o réxime franquista tiveron na produción de creadores galegos exiliados en América, truncando a súa traxectoria vital e evolución artística».

Deste xeito, o visitante terá a posibilidade de observar unha selección de catorce pezas de artistas ligados ideoloxicamente ao galeguismo, o nacionalismo e a República cunha vivencia moi semellante á de Castelao: Camilo Díaz, Federico Rivas, Arturo Souto e Uxío Souto -ambos bolseiros da Deputación-. Todos eles «foron asasinados, forzados a un longo exilio e impedidos de regresar ou obrigados a un asfixiante e represivo exilio interior».

Organizada pola responsable de Coleccións Ángeles Tilve, a mostra permite facer un percorrido temático relacionando as obras co Álbum de Guerra de Castelao -xa exposto dende 1981-.

Ata o de agora estas obras so se amosaron parcialmente en mostras temporais. Así, do ilustrador vigués Federico Rivas recóllense media dúcia de augadas nas que amosa a represión na zona de Bueu. No seu caso, «o golpe de Estado colleuno veraneando na vila do Morrazo e escapou a Portugal, como xa fixera tamén Maruja Mallo». Este álbum nunca estivera integrado na colección permanente.

Pola súa banda, de Arturo Souto exhíbese un álbum de debuxos de guerra que publicou o Ministerio de Propaganda Republicano e inclúese unha «peza que nin sequera se espuxera na expo antolóxica que se fixera en A Coruña e despois en Pontevedra a finais dos 90: un debuxo que estivo no pavillón español na Exposición Internacional des Arts et Técniques do 1937 en París co Guernica de Picasso e logo en Bruxelas». A acuarela Bombardeo foi publicada nunha revista da República e era coñecida pola reprodución na prensa ata que apareceu á venda e foi adquirida polo Museo.

O cuntiense Uxío Souto, ademais dalgunhas esculturas, asina dúas augadas que amosan a súa experiencia persoal ao final da contenda: «A fuxida das persoas vencidas polos Pirineos e a visión atormentada dos republicanos confinados no campo de refuxiados francés de Barcarés no que el tamén estaba internado».

De Camilo Díaz, pai de Isaac Díaz Pardo e irmán dos tamén artistas Indalecio, María Dolores e Ramiro Díaz Baliño, e que foi asasinado polos sublevados, amosase unha escultura.

Concerto

Dende a Deputación de Pontevedra destacaron que, con obxectivo de dar coñecer esta nova instalación, realizarse un concerto de música exiliada o 29 de xuño (19.30 horas) coincidindo co día seguinte ao aniversario da aprobación do Estatuto do 36.