O interese do público reforza aos difusores da cultura galega

Un ir e vir de xente responde ao entusiasmo de creadores e difusores reunidos no Pazo da Cultura


pontevedra / la voz

«A forza de Culturgal e a forza do público». Esta frase ven repetíndose dende a primeira edición da Feira das Industrias Culturais de Galicia. E ese público, fiel e orgulloso do noso, nunca defrauda aos creadores, produtores e difusores da cultura galega que participan neste proxecto colectivo dende hai dez anos.

O sol volve lucir con intensidade para a cultura galega no décimo aniversario de Culturgal e non só pola nova imaxe e logotipo da feira, deseño de Pepe Barro, senón polo crecente interese que espertan todas as propostas que se presentan no Pazo.

Din ben os organizadores cando sinalan que a oferta de actividades é tan ampla que as veces reborda a quen visita a feira. En todo caso, é cuestión de votar unha ollada a programación e escoller o que máis interesa a cada quen. Despois dun primeiro percorrido polo recinto e de visitar todos os expositores, hai quen dá outra voltiña máis detida e os ávidos lectores acaban atrapados nos postos das editoriais e librerías, mercando as últimas novidades literarias a prezos especiais.

Outros engánchase coa música que está soando nese momento no Espazo Carpa, onde onte presentaron novos discos o cuarteto de jazz 4Mal, directamente chegado desde O Carballiño, o percusionista Robertoliveira, o grupo Coro Encaixe, a Banda Crebinsky e 2US. Por Culturgar tamén anda estes días a cantante Sés que ten o seu propio stand, onde se pode mercar o seu último traballo discográfico.

Seguindo o percorrido, a xente detense no espazo común do libro. Alí estase a presentar un novo volume do Caderno Ramón Piñeiro dedicado a Carlos Casares. E a continuación chega Uxía para cantar a Uxío, unha obra multidisciplinar na que a cantante pon voz aos versos de Novoneyra.

Así chegamos ao Espazo Foro, onde nese momento estase a falar da Memoria Dixital Galicia, un proxecto da Xunta para a xestión e conservación do patrimonio bibliográfico, arquivístico e museístico, baseado nas novas tecnoloxías.

Entre o público que visita Culturgal hai moitas familias con nenos e no Espazo Infantil é onde se respira o ambiente máis divertido. Na feira hai ciencia para os pequenos, contacontos, teatro de marionetas, musicletas e instrumentos máxicos. E mentres os nenos gozan co seu, os pais tómanse un respiro na cafetería ou van botar unha ollada ao que está a acontecer no reforzado Espazo de Arte Contemporánea.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

O interese do público reforza aos difusores da cultura galega