O proxecto «Chamámonos así» leva rexistrados máis de 5.000 nomes en só cinco parroquias de Pontevedra
17 abr 2013 . Actualizado a las 07:00 h.Galicia posúe unha inxente cantidade de nomes de lugares, de topónimos, que as xentes foron bautizando dende tempos inmemoriais. Os nomes das aldeas, camiños, eiras, foxos, penedos e ríos constitúen unha parte do patrimonio e da identidade dos pobos.
Chamámonos así é un proxecto que puxo en marcha hai un ano o Concello de Pontevedra coa fin de recoller, por en valor e difundir a toponimia das parroquias do rural. O concelleiro de Normalización Lingüística, Demetrio Gómez, presentou onte a base de datos xa recollidos neste traballo de campo e que se poden consultar na web provisonal pontevedra.eu/snl/datos toponimia.
Ata o de agora, rexistráronse, 5.292 topónimos nas parroquias de Tomeza, Marcón, Santo André e Santa María de Xeve, Verducido e parte de Salcedo, onde aínda se está traballando ao igual que en Lourizán. Tamén se rexistraron 1.311 núcleos de poboación, 386 fontes e incluso 4 nomes de fincas que están baixo lámina de auga do Pontillón de Castro. A base de datos ofrece información lingüística dos topónimos e a súa localización nun plano, ademais de historias e lendas asociadas.
En Salcedo, por exemplo, ademais do Monte das Croas, tamén se atopa A Pedra das Mouras, que ten que ver con lendas de mouros. E en Lourizán, o topónimo Comboa fai referencia a unhas pedras desaparecidas baixo os recheos do porto de Marín.
Unha vez rematada a base de datos, a intención da Concellería de Normalización é remitir os informes pertinentes á Comisión de Toponimia da Xunta para que inclúa os novos topónimos entre os oficiais.
Para facer este recollida, os técnicos falaron con 275 veciños das citadas parroquias para que lles facilitaran toda a información posible sobre nomes de lugares e fixeron máis de seis mil enquisas.
Xornadas
Dentro deste proxecto se enmarcan as próximas Xornadas de Toponimia que se celebrarán o vindeiro 27 de abril na antiga Casa de Lusquiños (Tomeza) para dar conta do traballo que se ven facendo durante este último ano.
Neste encontro se presentarán as ferramentas empregadas para a recuperación dos topónimos e o Concello porá a disposición de quen a precise a base de datos. A xornada vai dirixida a asociacións de veciños, entidades culturais, profesorado e persoas interesadas no coñecemento deste patrimonio.
Participarán como poñentes diversos especialistas, como Xosé Lois Vilar, Mercedes Torres, Isabel Iglesias, Alberte Reboreda, María Ferro e Segundo Feijoo.