A Xunta prevé activar antes de final de ano os novos regadíos na comarca da Limia
XINZO DE LIMIA
Medio Rural anuncia un investimento de 1,6 millóns de euros nestas infraestruturas de rego en 4.150 hectáreas
26 jun 2018 . Actualizado a las 05:00 h.A reunión mantida entre responsables da Consellería de Medio Rural e regantes anteláns, dentro do comité de seguimento dos regadíos da Limia na Consellería en Ourense saldouse cun compromiso de inversión das novas infraestruturas de rego cifrada este ano en 1,6 millóns de euros. Os regantes deberán aportar o 20 % destes fondos.
A mesa na que se produciu este anuncio estivo composta polos presidentes das catro comunidades de regantes afectadas, os Concellos de Xinzo de Limia, Trasmiras e Porqueira, a Dirección Xeral de Desenvolvemento Rural, a Xefatura Territorial de Ourense e os técnicos de infraestruturas agrarias, Tragsa e a asociación Adegal.
Ante a colaboración de Adegal coas comunidades de regantes Corno do Monte, Alta Limia, Lamas-Ganade e San Salvador de Sabucedo, solicitouse a realización das sondaxes de investigación das captacións en 26 puntos, localizados e distribuídos na superficie a regar que ocupan as catro comunidades. Esa zona inclúe unhas 4.150 hectáreas de cultivo.
A presidenta de Adegal, Maite Joga, expuxo: «O proceso non vai coa rapidez que desexariamos, pero é así». Os responsables da Xunta avaliaron que a declaración de impacto ambiental publicarase en agosto e que a execución inicial do plan podería ter lugar antes de final de ano. Segundo Joga «xa están realizados os proxectos técnicos para as sondaxes, por tanto, só cabe esperar a execución das obras co orzamento asignado e que Medio Rural asuma os compromisos adquiridos nas últimas xuntanzas». Estes proxectos están pendentes na comarca dende hai máis dunha década.