«A identificación do pobo de Xinzo de Limia coa figura de Carlos Casares é total»

As actividades na honra do escritor hai meses que comezaron e terán continuidade durante todo o ano


ourense / la voz

Xinzo e A Limia foron a patria da vida e das historias de Carlos Casares (Ourense, 1941 - Vigo, 2002). Na biografía que se recolle na páxina web da súa fundación lémbrase esta vinculación: «Foi a comarca da Limia, en maior medida que o seu Ourense natal, o territorio que deixou unha pegada máis fonda no Casares neno. Nacera en Ourense, o 24 de agosto de 1941, pero aos catro anos marchou para Xinzo de Limia, onde o seu pai, Francisco Casares, traballaba de mestre». A vila sempre lle tivo lei e xa hai moitos anos que o autor de Vento ferido foi obxecto de homenaxes e actos nos que os limiaos amosaron sempre o recoñecemento que tiñan polo escritor. Dun deles -era o ano 2001 e entre os que o acompañaban estaba o escritor Fernando Sánchez Dragó- deixou testemuña nun dos artigos da sección Á Marxe, de La Voz de Galicia, coa peza titulada Convertido en placa. Xinzo acollerá o día 17 os actos centrais das Letras Galegas e o seu concelleiro de Cultura, Luis Miguel Gil Penín, hai tempo que traballa na coordinación das celebracións.

-Como se viviu a designación das Letras Galegas 2017?

-Para nós foi algo especial e desexado. A corporación de Xinzo xa reclamou no 2011 que se lle adicara o 17 de Maio a Carlos Casares e o ano pasado fixemos un acto nesa mesma liña, cunha homenaxe que se celebrou o 16 de maio do 2016.

-O reto está na cita do día 17?

-A celebración vai ser un acto moi importante para nós e dáralle unha relevancia especial á vila e ao escritor, mais Xinzo leva todo o ano programando actividades arredor da figura e da obra de Carlos Casares e cando remate o 2017 seguiremos a desenvolver proxectos e actividades.

-O secretario xeral de Cultura sinalou hai uns días que haberá un museo sobre o escritor. Xa teñen sede para o mesmo?

-Vai estar na planta baixa do Museo do Entroido. É dicir, o edificio manterá o seu uso como tal e adicaremos o baixo ao Museo Carlos Casares.

-Teñen xa o proxecto definido?

-Si. En Ourense está aberta neste momento a mostra Os mundos de Carlos Casares que, logo de percorrer Galicia, virá a Xinzo de Limia. Aquí quedará instalada de xeito permanente e será a colección de materiais e documentos que formen o museo. Mantemos un convenio de colaboración coa fundación e en base a el iremos incorporando pezas e renovando contidos.

-Desenvolverán algunha actividade ou será só o apartado expositivo o obxectivo do museo?

-Non. A nosa intención é seguir promovendo actividades ao longo do ano. Nós temos un premio de relato curto co seu nome e Carlos Casares é a denominación dunha praza, dun aula e dun centro educativo en Xinzo, e seguiremos nesa liña. O futuro museo acollerá cada ano, estamos ultimando as datas, unha semana de actividades arredor da súa figura e a súa obra. E haberá máis propostas e proxectos.

-Estanse desenvolvendo actividades na Limia dende diferentes centros e colectivos. A escolla da RAG suscitou unanimidade?

-Tanto el como toda a súa familia son xente moi querida e persoas das que toda a Limia se sinte orgullosa. A identificación do pobo de Xinzo coa figura de Carlos Casares é total e todos os colectivos e cidadáns apoian e celebran a decisión da Real Academia Galega.

«O Concello destina unha partida de 55.000 euros aos actos en memoria do autor»

Luis Miguel Gil Penín (Valladolid, 1976) é o responsable de Cultura, Deportes, Educación, Festexos e Xuventude no Concello de Xinzo de Limia. Con catro anos volveu para a vila -os pais estaban na emigración cando el naceu- e lembra a figura da persoa que durante este ano protagoniza a festa da cultura de Galicia.

-Coñeceu vostede a Casares?

-Personalmente, de tratalo, non. Si que me lembro de velo por aquí e de coincidir con el no pobo e en actos que se celebraron en Xinzo.

-Que actividades está previsto celebrar o 17 de Maio?

-Haberá feira do libro todo o día. A primeira hora será a recepción de autoridades e académicos na Casa da Cultura e ás 11.30 horas comezará a asamblea da Real Academia Galega no salón de plenos do Concello de Xinzo. Logo procederase á descuberta dunha plaza conmemorativa na praza Carlos Casares, lectura de textos do autor e unha pequena actuación de María do Ceo. O acto institucional comezará ás 13.00 horas e durante todo o día temos programadas actividades: dende unha concentración de motos Harley Davidson, das que el gostaba, ao concerto de María do Ceo que rematará o programa do 17 de Maio en Xinzo.

-O día anterior xa teñen actos.

-Presentaremos o libro Á marxe do Limia, haberá un foro de escritores limiaos e un concerto.

-Contan con axudas das institucións?

-Como xa dixen a corporación e o pobo celebran a elección da RAG e isto é un acontecemento histórico. O Concello destina unha partida de 55.000 euros á programación que se adica este ano á memoria do escritor. Dende a RAG e a Xunta temos recibido felicitacións pola implicación nestas Letras Galegas 2017. E hai colaboración doutras institucións, como sempre nestes casos.

Conoce nuestra newsletter con toda la actualidad de Ourense

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
1 votos
Comentarios

«A identificación do pobo de Xinzo de Limia coa figura de Carlos Casares é total»