Fiscal e acusación particular pídenlle 14 anos de inhabilitación e 5 de cárcere; o alcalde de Vilariño de Conso, Ventura Sierra, di que está «tranquilísimo»
08 oct 2016 . Actualizado a las 14:28 h.O alcalde de Vilariño de Conso, Ventura Sierra -militante do Partido Popular ata o mércores, cando pediu a baixa- sentarase no banco dos acusados. O fiscal e a acusación particular -exercida por dous concelleiros da oposición e un terceiro que non saíu elixido o ano pasado- pídenlle 14 anos de inhabilitación e cinco de cárcere por ter cometido, presuntamente, os delitos de prevaricación e falsidade documental. Sierra aseguraba onte que pedira a baixa no Partido Popular «xa fai uns días, para non prexudicar ao partido». Di que foi idea súa, que ningún llo pediu.
-¿Pensou en dimitir?
-Non, ¿por que? Eu non teño por que dimitir, non teño motivos, eu non fixen nada malo. A min votáronme os veciños e non o Partido Popular.
-¿Confía en saír absolto?
-Eu espero que si. Eu non fixen nada ilegal; non vexo por que, se estaba mirando polo ben da xente. Eu sempre mirei por darlle de comer a quen máis o necesitaba e o pedía. E dese xeito entrou [a traballar no Concello] xente de todos os signos, eu nunca lle preguntei a militancia a ninguén, a pesar de que sabía que ían nas listas doutros partidos.
-Agora cambiou a forma de contratar en Vilariño, ¿non?
-Agora si que cambiamos iso, evidentemente. Antes non, e faciámolo por manter á xente do Concello.
-¿Pero non lle dicían que iso non se podía facer así?
-A secretaría advertía, si; pero iso era habitual nos Concellos. Tamén aquí cando gobernou o bipartito do PSOE e do BNG, tamén fixeron contratacións do mesmo xeito. Para eles estaba ben, e para min, vese que non... Eu non sei, pero penso que non é un delito. Eu non son un criminal, nin un ladrón, nin un violador... Eu o único que fixen foi escoitar aos veciños.
-Recoñece que metía xente a dedo para que non entrara xente de fóra...
-Non, non era a dedo. O que non se facía era publicidade, para que non viñera xente de fóra.
-¿E como se enteraban os veciños se non se publicitaban os postos?
-No pobo todo o mundo se enteraba. E a demanda de emprego facíase ao Inem, que era o que notificaba.
-¿Pensa en chegar a acordo coa fiscalía e evitar xuízo?
-Non, non. De momento non.
-¿Pídenlle cárcere, non lle impón esa posibilidade?
-Non. Pódense pedir moitas cousas, tamén eu pido que me toque a Lotería, e nunca me tocou. Eu creo que non hai delito, hai unha falta de procedemento, pero non penso que sexa motivo para ir ao cárcere.
-¿Como leva o día, recibiu moitas chamadas de apoio?
-Si, varias. Estou tranquilísimo, penso que non fixen nada malo.
-¿Como é a relación coa oposición, que foi quen levou o tema á fiscalía?
-En ningún sitio son boas as relacións coa oposición, non sei por que en Vilariño ía ser distinto.
-Pero non en todos os sitios acaban nos tribunais.
-Iso depende de que a xente traballe con sentido común, porque aquí, hai algún que estivo polo mesmo sistema traballando el no concello. El, o pai, a cuñada... toda a familia, vamos, e non dixo nunca nada. E agora isto.
-E o resto de concelleiros do seu goberno, ¿seguen no PP?
-¡Claro! Non teñen por que pedir a baixa, porque con eles non é nada.