As noites de verbena, banda sonora do verán galego durante xeracións, toman forma expositiva en Botamos un baile?, unha mostra que pode visitarse na Alameda de Ribadavia ata o 29 de xullo. Xestada na Cidade da Cultura, repasa a historia das orquestras populares desde 1919 ata hoxe, mediante carteis e imaxes que retratan un fenómeno moi activo. A través destas pezas, pódese apreciar a adaptación a cada época dun xeito de lecer profundamente arraigado en Galicia, cun tecido económico propio do sector, en permanente desenvolvemento e innovación.
Na inauguración, o director xeral de Cultura, Anxo M. Lorenzo, destacou o valor emocional e social destas formacións musicais que seguen a mobilizar milleiros de persoas en toda a comunidade. Pola súa banda, o alcalde de Ribadavia, César Fernández, salientou a importancia de lembrar a identidade galega: «Para o concello de Ribadavia é un privilexio ter aquí esta exposición que nos permite recordar algo que forma parte da nosa cultura e tradición popular», afirmou.
A mostra é froito dun estudo da USC coordinado por Xaime Fandiño e comisariado por Zósimo López e Henrique Neira, con deseño de Fausto Isorna. Ribadavia convértese así na segunda vila en acoller esta itinerancia tras o seu paso por Ponteareas.