Os textos teatrais, escritos en galego, poderán presentarse ata o 18 de xuño
06 feb 2021 . Actualizado a las 05:00 h.Unha nova edición, a número 16, do Premio Abrente xa está en marcha. As bases do recoñecemento teatral que impulsa a Mostra Internacional de Teatro de Ribadavia foron aprobadas no último pleno do Concello. Todas as persoas que desexen presentar os seus textos, -terán que ser obras orixinais e inéditas en lingua galega-, poderán facelo ata o 18 de xuño. Deberán presentarse por triplicado e garantindo o anonimato do seu autor.
Os obxectivos principais deste premio son fomentar a creación dramática contemporánea en galego e favorecer a diversidade de estilos e estímulos da creación escénica contemporánea de Galicia.
O Premio Abrente pretende ser unha plataforma estable e dinámica para a dramaturxia galega. Ten unha dotación de 3.500 euros, máis a edición da obra e o apoio do festival a través das súas coproducións. Todos os detalles do procedemento da convocatoria do certame poden consultarse na web da MIT.