«A Mostra é a porta de entrada de espectáculos internacionais a Galicia»

O director da MIT salientou na inauguración o papel de Ribadavia na escena galega


ourense / la voz

«A Mostra é a porta de entrada dos espectáculos teatrais internacionais máis importantes a Galicia», actuando a MIT como un crisol onde se dan cita as mellores producións de países de todo o mundo. Así o asegurou o director, Roberto Pascual, na inauguración dunha nova edición do festival. Definiu á cita de Ribadavia como unha das institucións de Galicia e lembrou que nesta edición, na que cumpre dez anos dirixindo o certame, a aposta pola internacionalización está máis presente que nunca.

 

O secretario xeral de Cultura, Anxo Lorenzo, representou á Consellería no acto. Non tomou a palabra na inauguración da MIT 2018 polo pasamento do expresidente da Xunta.

A Xerardo Fernández Albor referiuse Roberto Pascual, para expresar as condolencias polo seu falecemento e para lembrar que dende a súa faceta como presidente de Galicia tamén contribuiu a facer de Ribadavia a capital do teatro galego. O subdelegado do Goberno, Emilio González Afonso, referiuse á Mostra de Ribadavia como un orgullo para Galicia e asegurou que o Ministerio de Cultura seguirá contribuindo a potenciar o festival de teatro da capital do Ribeiro. Na mesma liña, e lembrando a implicación da Deputación co certame, se expresou Rosendo Fernández. Pola súa banda o alcalde, Ignacio Gómez, lembrou o legado de Abrente e dos pioneiros que fixeron de Ribadavia unha referencia para a escena galega.

 

Premio Vidal Bolaño

Na xornada inaugural contouse coa actuación de De Vacas e os escenógrafos Carlos Alonso e Suso Montero recibiron o premio de honra que mantén viva a memoria de Roberto Vidal Bolaño.

Obradoiro con Marianella Morena, presentación de libro e estrea de Pippo Delbono

Logo da xornada inaugural, a MIT chega hoxe cun amplo programa de actividades e a agardada estrea absoluta no Estado da montaxe do italiano Pippo Delbono.

 

satélites

Arranca o SputMIT. Comeza o Satélites da MIT coa representación da montaxe Contiguo, de IO Circo, no pobo de San Cristovo. Será ás 13.00 horas.

 

 

 

obradoiro

Cita con Marianella Morena. O taller coa directora e dramaturga uruguaia Marianella Morena desenvolverase de 16.30 a 19.30 horas.

 

 

ruadavia

Alameda. A MIT aposta polas montaxes de rúa e para esta tarde está programada a presenza do grupo La Trócola na Alameda. Estarán coa obra Emportats a partir das 20.00 horas.

 

 

 

publicación

Concello. Presentación na consistorial do libro Confio-te o meu corpo. A dramaturxia pós-dramática, de Afonso Becerra de Becerreá. Presenta Tiago Guedes. Será ás 21.30 horas.

 

 

 

castelo

Estrea de Pippo Delbono. No auditorio do castelo de Ribadavia estará esta noite (23.00 horas) o recoñecido artista italiano Pippo Delbono. A compañía Emilia Romagna Teatro Fondazione-Pippo Delbono Company porá en escena La Gioia (A ledicia). Xunto a Delbono, autor e director, protagonizan a montaxe Dolly Albertin, Gianluca Ballarè, Bobò, Margherita Clemente, Ilaria Distante, Simone Goggiano, Mario Intruglio, Nelson Lariccia, Gianni Parenti, Pepe Robledo, Zakria Safi e Grazia Spinella.

 

Apoio ao teatro afeccionado

A Pre MIT estivo protagonizada pola compañía Teatro do Vilar. No auditorio do castelo estreouse a montaxe «Non se chora», dirixida por Jouse García e protagonizada por Rafael Carrera, Elvira García, Juan Carlos Fernández, Sandra Vidal, María García e Edmundo Araújo. foto santi m. amil

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«A Mostra é a porta de entrada de espectáculos internacionais a Galicia»