«O seminario para min foi a salvación e cambioume totalmente a vida»

O director do Servicio Público de Empleo Estatal, José Pérez Iglesias, ten previsto volver ao seu posto no IES O Ribeiro


ourense

O director do antigo Inem en Ourense vive na provisionalidade. Sabe que ten data de caducidade no seu cargo, como todos os baseados na discrecionalidade dos partidos no goberno -neste caso no central ao ser o Servicio Público de Empleo Estatal (SEPE) un organismo dependente no Ministerio de Traballo-, e ten claro que o seu futuro pasa por volver ao ensino. Profesor de Xeografía e Historia no IES O Ribeiro, de Ribadavia, confesa que garda especiais lembranzas desa etapa e dos anos que pasou formando aos rapaces da comarca. Entre o instituto e o SEPE (antes Inem) José Pérez Iglesias desenvolveu unha carreira política que estivo vencellada ao Concello de Ribadavia -gobernando en coalición, como alcalde ou na oposición- e á Mancomunidade do Ribeiro.

O PNG foi o espazo ideolóxico onde de moveu nos seus comezos na política e nun tempo onde esta formación -Partido Nacionalista Galego-Partido Galeguista- contou con dúas consellerías no goberno tripartito de Fernando González Laxe na Xunta. Na división interna derivada da integración no BNG, Pérez Iglesias decantouse polo camiño dun novo escenario e presentouse ás eleccións en Ribadavia cunha lista independente. Foi socio de goberno do PP, con Jaime Dávila de alcalde, e logo exerceu como rexedor municipal no seguinte mandato ao ser cabeza de lista do PP -entre 1999 e o 2003-. Deses oito anos no goberno, como tenente de alcalde e rexedor respectivamente, lembra con especial satisfacción actuacións como a reforma da Veronza -proxecto xa adxudicado que comezou aos dez días de abandonar o cargo-, o parque empresarial de San Cristovo e o PERI (Plan Especial de Reforma Interior) do casco histórico. «Daquela toda a zona monumental estaba moi mal e grazas ao PERI, contra o que votaron PSOE e BNG, foise rehabilitando e recuperando e aí están os resultados». Nun escenario de proximidade a decisión de José Pérez Iglesias pasa por voltar ás aulas do IES O Ribeiro. Alí está a súa praza, logo de iniciar a súa carreira docente en Viana do Bolo e pasar por Xinzo. Botou máis de 25 anos adicado ao ensino e garda un bo recordo «da etapa na que fun director, entre os anos 80 e 90. Era cando se elexía por primeira vez aos directores e foi unha sensación moi gratificante polo apoio recibido e pola ilusión coa que traballabamos todos os profesores e o equipo directivo naqueles tempos».

Nos últimos anos alternou a docencia coa dirección do Inem: nunha primeira etapa entre os anos 1996 e 2003 e na actual leva dende o 2012. Non comparte a mala imaxe que ten o servizo e incide no descoñecemento que existe ao respecto. «Hai dúas facetas: a autonómica -que é a que realmente ten as facultades para crear emprego- e a estatal, que é onde eu estou. Na de carácter nacional o único cometido é o relativo ao pago do paro e o resto de prestacións».

Unha etapa para lembrar

Á hora de escoller un espazo emblemático da cidade o exalcalde de Ribadavia e director do SEPE non ten nada que cavilar: o seminario. Con total agradecemento, admiración e recoñecemento caraa o lugar admite que «o seminario para min foi a salvación e cambioume totalmente a vida». Os pais de José Pérez Iglesias emigraron a Venezuela cando era un cativo e el quedou na aldea, a cargo dunha avoa que tiña alzhéimer. «Veño dunha familia moi humilde. Na miña casa non había medios e o seminario deume a posibilidade de formarme e inculcoume unha serie de valores -como o traballo, o esforzo, o costume do estudo, o respecto e moitos outros-. Nunca tiven vontade nin vocación de ser crego, mais sempre lle estarei agradecido porque se non chego a pasar polo seminario estou certo que a miña vida tería sido moi diferente, e non para mellor».

Do seminario pasou ao Colexio Cisneros e de aí ao Otero Pedrayo, onde ía á quenda nocturna porque polo día traballaba en Pérez Rumbao. E logo xa foi cando estudou a carreira. Un percorrido que, ten claro, nunca faría de non pasar polo seminario.

«Ribadavia sempre tivo un problema cos seus líderes políticos e co inmobilismo»

José Pérez Iglesias coincide nesa valoración recurrente que incide nunha capital do Ribeiro que non dá superado a eterna loita coa perda de poboación e con tirarlle rendemento a un patrimonio, un entorno -ao pé do Avia- e unha situación estratéxica que deberían servir para dinamizar a vila. «Ribadavia sempre tivo un problema cos seus líderes políticos e o seu inmobilismo. É certo que poderíamos estar moito mellor que Allariz, pero a falta de gobernos estables non axudou a traballar nese senso».

Lembra que el decidiu retirarse cando chegou o momento mais sinala que un dos problemas que ten a política municipal da capital do Ribeiro «son moitos dos seus líderes políticos, que non aceptan a realidade e en lugar de retirarse adícanse a crear problemas aos seus propios compañeiros. Algún ata se propuxo de candidato á alcaldía con 85 anos e outros, de todos coñecidos, levan toda a vida argallando para non perder poder en lugar de favorecer unha alternativa e apoiala».

Quen é. Profesión. O seu lugar.

Quen é. José Pérez Iglesias naceu en Orega (Leiro) no ano 1952.

Profesión. É profesor de instituto. Foi director do IES O Ribeiro, alcalde de Ribadavia e presidente da Mancomunidade de Concellos do Ribeiro. Dende o ano 2012 é director do SEPE (Servicio Público de Empleo Estatal) en Ourense.

O seu lugar. O seminario foi a súa táboa de salvación. Nel accedeu á educación, formouse e rematou por facer unha carreira e adicarse ao ensino.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

«O seminario para min foi a salvación e cambioume totalmente a vida»