Uxía, Gayoso e Lois Antón recibirán os premios Rebulir de Cultura Galega en Ramirás

A asociación cultural distingue a persoas que traballan pola difusión e posta en valor da cultura


ourense / la voz

A asociación cultural Rebulir, de Ramirás, que organiza desde o ano 2012 os Premios Rebulir de Cultura Galega, entregará este ano durante o seu festival de Nadal os galardóns á músico Uxía Senlle, ao presentador da TVG Xosé Ramón Gayoso e ao poeta local, Lois Antón Pérez.

O nome dos premiados deste ano decidiunos un xurado, de forma unánime, nunha xuntanza celebrada o 31 de agosto na Deputación, pero o contido da acta deuno a coñecer onte a asociación cultural.

Na categoría de música galega, concédeselle o galardón a Uxía Senlle «ola súa longa e prolífica traxectoria no eido da música galega, proxectada alén das fronteiras do noso territorio». No apartado de cultura galega, o premiado deste ano é Xosé Ramón Gayoso «por ter contribuído a difusión e a posta en valor da cultura galega desde a plataforma audiovisual que supón o programa Luar da TVG». E na categoría de homenaxe, o distinguido é Lois Antón Pérez, «como recoñecemento a unha vida persoal e profesional adicada a literatura galega, en e desde Ramirás».

Un dos aspectos que defenden estes premios é a proxección do nome de Galicia «alén das súas fronteiras», ademais de recoñecer a persoas ou colectivos que contribúan á difusión da cultura galega nas súas distintas manifestacións.

A entrega dos premios farase durante a gala central de Rebulir, que será no mes de decembro, concretamente o día 16, no polideportivo do Picouto, en Ramirás. Daráselles un diploma e unha estatuíña feita por algún artista galego.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Uxía, Gayoso e Lois Antón recibirán os premios Rebulir de Cultura Galega en Ramirás