As actividades comezarán as once da mañá e á tarde haberá un concerto de Xabier Díaz e Adufeiras de Salitre
30 abr 2025 . Actualizado a las 05:00 h.Día 4 • A partir das 11.00 horas • Rúas do centro da cidade • Ourense revivirá este domingo, día 4, a tradicional festa dos Maios. Unha celebración que comezará ás 11.00 horas e que terá a súa cita de clausura no concerto que Xabier Díaz e as Adufeiras de Salitre ofrecerán ás 19.30 horas na praza Maior da cidade.
A media mañá, ás once, comezará a exposición dos maios participantes na rúa do Paseo. Mesma hora á que está previsto o inicio do obradoiro de confección de coroas e peiteados —xunto á escultura da Leiteira—. Media hora despois chegará a ruada de cabezudos e xigantes. A música tradicional percorrerá Paseo, San Lázaro, San Domingos, Praza do Ferro, rúas da Paz e das Tendas e praza Maior. A partir das 12.00 horas será o canto das coplas diante do xurado. Xa pola tarde, ás 19.00 horas, será a entrega dos premios nas dúas modalidades: maios e coplas. E logo actuarán Xabier Díaz e as Adufeiras de Salitre.
As categorías a concurso serán as de Maio artístico, Enxebre e Creativo —no caso dos adultos— e a de Maio Infantil —menores de 18 anos, colexios, Anpas e demais—. No caso das coplas dúas son as categorías a concurso: a dirixida aos adultos e a infantil. O Concello de Ourense contempla unha axuda de 400 euros para todos os maios que participen.