O presidente unionista fala de abordar a planificación coa idea de mellorar
17 may 2022 . Actualizado a las 05:00 h.Hai un ano, as mensaxes que recibía Fernando Currás polo descenso da UD Ourense eran tristes, de ánimo pero tristes. Onte luns, o seu teléfono móbil volveu ferver, pero con chamadas de parabéns. «É o que ten o fútbol, é todo moi esaxerado», di, con filosofía.
—Este ano na Preferente ía ser para a reconstrucción. O primeiro equipo xa volve á Terceira. Deu tempo a reconstruír, pódese seguir facendo na nova categoría?
—Hai que planificar, pero temos claro o que queremos. A idea xeral é mellorar e tamén esa é a idea nesta categoría. Facelo o mellor que poidamos. Aínda quedan dúas xornadas e a Copa e haberá que concretar, pero hai que mellorar certas cousas e mirar por onde podemos ir. Porque no fútbol é todo moi esaxerado e vai moi rápido. Nós temos que manternos en ser o mellor que poidamos, pero sen excesos, sen pasarnos, e coa idea clara de seguir mellorando a canteira porque é o futuro.
—A afección, que nunca se foi, parece que reenganchou máis con este equipo. Como manter esa unión?
—O que nos dá a nosa afección é unha tolemia. Non hai palabras para reflexalo. O domingo volveuse demostrar que este club é diferente: os nenos que había en Meis, os utilleros, éramos todos un. Esa afección obríganos a dar o mellor de nós.
—Que soubo do incidente da celebración en Ourense, cunha bengala que feriu un policía?
—Falei co policía para darlle ánimos e condear eses actos, que son unha barbaridade. Pero iso non debe restarlle protagonismo ao comportamento exemplar que tivo a nosa afección toda a temporada. Sempre me felicitaban nos campos os que iamos. A nosa afección non é a que tira unha bengala.
—Continuidade, regularidade os bos resultados ou bo xogo. Cal destas virtudes do equipo valora máis?
—O que valoro é ese vínculo, esa comunión dese vestiario cos xogadores que, despois dun descenso, se quedaron. Non dubidaron nese compromiso. Pero, por riba de todo, Jorge e Toni teñen unha moi alta porcentaxe do éxito da UD Ourense. Os xogadores tamén, pero gañar todos eses partidos e manter esa regularidade non é cuestión de sorte. Os que estamos dentro do fútbol sabemos da dificultade que entraña. Temos boa plantilla e bos xogadores, a xente sabe que equipo somos, pero hai que poñer en valor o traballo de Jorge e Toni.
—Eses factores reverteron positivamente a nivel social e institucional? Foi un bo ano para o club en ingresos, patrocinios e masa social?
—Da parte da directiva, agradezo a colaboración dos que se xuntaron comigo, se non non podiamos facer nada. Fixemos actividades para poñer en valor a UD Ourense e para chegar a ter impacto na sociedade. E hai que seguir por esa vía. Houbo un traballo esaxerado para xerar recursos e logramos salvar unha temporada chea de incertezas. Iso era a nosa obriga e síntome satisfeito.
—Inda non rematou a temporada, pero este será o equipo base para a próxima temporada na Terceira?
—Temos que sentarnos con Jorge e Toni, porque van ser eles quen decidan. Estamos súper orgullosos da plantilla e os xogadores poden estar tranquilos polo que fixeron. Cando acabe todo, hai que falar e concretar, pero coido que a maioría seguirán.
—Logo, o corpo técnico continuará?
—Non temos un contrato asinado, pero non espero sorpresas por ese lado. Para o club é fundamental que continúen. Nós darémoslles facilidades e recursos porque os van saber manexar. Intentaremos achegarnos ao que nos pidan.