Catro proxectos interdisciplinares acadan as axudas do campus e da Deputación de Ourense
OURENSE CIUDAD
A oferta e reputación dixital do enoturismo ourensán; a interpretación patrimonial de sitios con pintura rupestre esquemática da comarca de Monterrei; a análise e prevención de condutas aditivas e de risco nas redes sociais e a intervención para o uso seguro de cara ao benestar dixital e, por último, o emprego de restos de podas de vide para a obtención de produtos de valor engadido son as temáticas dos catro proxectos financiados a través da convocatoria de axudas a grupos de investigación do campus de Ourense, financiada pola Universidade de Vigo e pola Deputación de Ourense.
A convocatoria, dotada con 45.000 euros en total, pretende, tal e como recollen as súas bases, apoiar investigacións que contribúan ao desenvolvemento social e económico da provincia de Ourense e ao coñecemento da súa realidade, así como á especialización do campus de Ourense como Campus da Auga.