O Arousa, ante a misión de vencer a un líder cunha derrota en 20 partidos

«No vamos a enfrentarnos únicamente al líder, vamos a enfrentarnos a un líder sólido, muy consistente». Rafa Sáez enmarcaba na véspera o nivel de esixencia que o Arousa ten ante si este serán (A Lomba, 20 horas) no seu enfrontamento adiantado da duodécima xornada de Liga co Ourense C.F. Un equipo que, lembraba o técnico arlequinado, gañou nove dos seus once partidos na presente Liga, na que tan só encaixou unha derrota -na segunda xornada, no campo do Deportivo B-, pero que ademais «trae una inercia positiva del año pasado, en el que acabó con la miel en los labios» a tan só un punto de acceder á fase de ascenso.

O Ourense C.F. chega a Vilagarcía cunha única derrota nos seus últimos 20 partidos na Terceira División, logo de encadear senllas vitorias nas nove últimas xornadas do campionato 2018/19. O Racing Vilalbés, o 24 de marzo cun 0-2 no estadio do Couto, foi o anterior precedente en negativo ao do tropezo co filial herculino do conxunto que dirixe Fran Justo.

Con Trapero como única baixa, Rafa Sáez convocou a todos os demais efectivos do seu cadro de persoal. Incluído a Róber, coma Pedro García, integrante do Ourense C.F. a tempada pasada, recuperado a tempo dos problemas físicos que lle impediran disputar o encontro da semana anterior. Preguntado por que partido agarda sobre o céspede da Lomba, despois de salientar a facilidade goleadora do seu rival -é o equipo máis anotador da Liga- e a súa solidez defensiva -segundo que menos encaixa-, o técnico do cadro vilagarcián prevé «un partido de ataque». Sinalando a aposta visitante por unha zaga de tres centrais e de carrileiros moi ofensivos, e arriba, «con tres jugadores con total libertad, y aparente anarquía de movimientos».

Como xa fixera ao inicio da semana, Rafa Sáez lanzou unha mensaxe á afección, animándoa a apoiar o equipo como xogador número 12: «El apoyo de la afición para nosotros va a ser fundamental. Estoy seguro de que nos va a ayudar». Conta tamén con que «un partido de lo más atractivo un sábado por la noche atraiga a gente de otros equipos de la comarca». Todos os espectadores deberán concentrase na grada de tribuna e nos fondos, ao estar pechada a de preferencia polo inicio dos traballos de substitución da súa vella cuberta.

Pola súa banda, desde Ourense Fran Justo cualificou o Arousa como un dos tres mellores equipos da Liga esta tempada, xunto co Deportivo B e co Compos. Loanzas que estende a «un grandísimo adestrador», en referencia a Rafa Sáez, e á Lomba, «un dos campos máis complicados da categoría», di. A ilusión do seu equipo, confesa, «é pelexar por acabar xogando a fase de ascenso».

---

---

---