«Tivemos a capacidade de sacar ao PSOE dese túnel de pactar con Jácome»

O candidato de Ourense en Común, Vázquez Mato, propón unha «revolución verde» para cambiar a mobilidade na cidade


Ourense

As enquisas prognostican un baixón en apoios ás mareas de toda Galicia. Ese espazo político está representado na cidade por Ourense en Común e o seu candidato á alcaldía é Martiño Xosé Vázquez Mato (Ourense, 1983).

-¿Foi flor dun día a irrupción deste espazo político?

-As enquisas son totalmente respectables, pero no ano 2015 dábanlle a Marea Atlántica cinco concelleiros e acabaron gobernando. Unha análise política como esa non se debe facer en base a enquisas senón a partir do 27 de maio. A partir de aí será interesante facer ese tipo de valoracións como tamén do impacto que tiveron procesos supramunicipais no local.

-Arrepíntese de non ter chegado a un acordo con Podemos e Esquerda Unida?

-Ourense en Común segue apostando pola mesma fórmula que no ano 2015, que na nosa opinión é a única fórmula para arrebatarlle o poder ao PP. 2015 foi a proba evidente gañándose as alcaldías de Santiago, A Coruña e Ferrol e despois convertendo a ese espazo na segunda forza política do país. Se algo se moveu non foi Ourense en Común e, de feito, aínda que Podemos non estea, Ourense en Común é o único espazo a escala local que aglutina varios partidos políticos e ao mesmo tempo ao tecido social e activista da cidade.

-Vostede chegou a ofrecerlle a Podemos o número dos da candidatura, pero finalmente non foi así. Por que?

-Eu só podo dicir que fixéronse todos os esforzos posibles para que Podemos estivera neste espazo, pero o proxecto político vai moito máis alá e ten que estar por riba todo, de min mesmo tamén. Ourense en Común é un proxecto colectivo que ten vocación de continuidade pase o que pase nas eleccións. E hai unha grande diferenza entre o proxecto político de Ourense en Común e o de Podemos: que Ourense en Común si é de Ourense e si coñece os problemas de Ourense. Penso que houbo un repregue partidario a posturas previas ao 2015, non só aquí, e creo que é un erro.

-Que foi o que máis lle sorprendeu da realidade da política municipal?

-Unha das cousas que máis me sorprenderon é que temos a cidade no estado no que está porque a veciñanza non se empodera e dá un golpe enriba da mesa para cambiar esta cidade. O Concello ten unha gran capacidade para transformar as cousas, pero o que non hai é vontade, capacidade e dilixencia por parte daqueles que teñen que firmar os decretos. Sorprendeume moitísimo a capacidade que temos e o mal que a estamos empregando.

-O alcalde culpa a oposición.

-Tiveron catro anos para facer millóns de cousas que non necesitan nin sequera o respaldo da oposición. O goberno tiña capacidade suficiente para reconfigurar, por exemplo, o tráfico da cidade. Ademais, tiveron tres anos para presentar uns orzamentos e so presentaron uns que eran ilegais e podían aprobalos cunha moción de confianza, pero non o fixeron. Cando o mal estudante suspende a culpa é do profesor, ¿non? Nós facemos autocrítica, pero eramos 3 de 27 e non decantabamos a balanza cara un lado nin cara o outro.

-Por iso non apoiaron a moción de censura proposta por Jácome?

-Díxeno no último pleno porque quería que constase en acta. Ourense en Común deu un paso moi valente intentando marcar a axenda coa moción de censura. Non sendo determinantes, a solución máis cómoda era poñernos de perfil e ver como se mataban o PSOE e DO entre eles e nós quedariamos como unha oposición responsable. Pero decidimos dar un paso adiante e traccionar ao PSOE a posicións de progreso. Eu creo que tivemos a capacidade de sacar ao PSOE dese túnel de pactar con Jácome. ¿Por que non saíu a moción de censura? Porque non había unha maioría alternativa de progreso.

-E, sen embargo, vostede sostén que o actual candidato socialista si pactará con Jácome.

-É unha realidade. Pregunteillo a Villarino en moitas ocasións porque neste escenario político, con quince candidaturas, entendo que o electorado quere saber con quen vas a pactar. No debate da TVG Jácome xa llo dixo: «Yo me reuní contigo en un piso de un concejal». É dicir, xa hai un pacto e por iso avisamos aos votantes do PSOE que se vaian preparando para ver a Jácome como tenente de alcalde. Nós entendemos que calquera persoa que vote en clave de progreso non o vería moi ben, igual que non verían ben que pactase con Vox. Con Barquero era clarísimo que non ía haber un pacto con DO e agora parece ser que si. E Jácome xa lle puxo nome, «o pacto do pisito».

-Se Ourense en Común puidese influír no goberno, ¿cal sería a súa prioridade a partir do 27M?

-O 27M se Ourense en Común ten capacidade o primeiro e inmediato é unha revolución verde en Ourense. Iso pódese facer de forma inmediata porque non son necesarias grandes obras, esas virán despois. A reorganización do tráfico e pacificación da cidade é urxente. Despois habería actuacións prioritarias que requiren de máis tempo, como a transformación da política fiscal do Concello para que sexa progresiva. E na área social, non pode ser que, por exemplo, o Concello teña listas de espera en becas de comedor ou material escolar cando en cidades máis pequenas como Compostela multiplicouse por tres ese financiamento.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

«Tivemos a capacidade de sacar ao PSOE dese túnel de pactar con Jácome»