O OUFF presenta o libro sobre a obra do director Xavier Bermúdez

O monográfico, elaborado polo crítico de cine Eduardo Galán, foi presentado esta mañá no Centro Cultural Marcos Valcárcel


Ourense / La Voz

Un dos momentos máis esperados deste OUFF chegou coa presentación da monografía sobre a obra de Xavier Bermúdez -director e guionista ourensán que recibiu este ano o premio Calpurnia de Honor-. No encontro cos medios e o público, o cineasta e o crítico e historiador Eduardo Galán -autor do libro- desgranaron algúns segredos sobre o proceso de elaboración da que é a primeira publicación existente sobre o traballo Bermúdez.

«Ourense é terra de cineastas e de miradas particulares e temos o orgullo de ter a Xavier entre eles, ao que inda lle queda moito por contar», explicou Galán no acto de presentación de «Dos pés á cabeza».

Coa intención de que Ourense sexa o epicentro do cinema galego durante estes días, a organización do Festival de Cine Internacional (OUFF) programou unha serie de actividades que van máis aló das proxección nas salas de cine repartidas por toda a cidade. Hoxe tocou o turno de coñecer as axudas á produción audiovisual coas que a Xunta de Galicia pretende que se poidan facer proxectos máis competitivos.

Jacobo Sutil, director da Axencia Galega de Industrias Culturais (AGADIC), explicou que as axudas que xestiona AGADIC cubren «toda a cadea de produción», dende a idea dun proxecto ata a súa difusión, e que resultan «fundamentais» para o crecemento do sector audiovisual na rexión. Dentro das medidas para difundir as creacións audiovisuais galegas destacan o programa Cinemas de Galicia, que permite o acceso a unha pantalla grande en lugares onde non hai salas comerciais, e que se desenvolve en varios municipios galegos dende 2014; así como a colaboración entre a Filmoteca de Galicia e os cineclubes locais para proxectar cine menos comercia.

Ademais, Sutil, fixo balance da colaboración co Cineclube Padre Feijoo para o desenvolvemento da extensión ourensá da programación do Centro Galego de Artes da Imaxe (CGAI)-Filmoteca de Galicia. No acto tamén participaron Manuel Precedo, presidente da Asociación Cultural Cineclube Padre Feijoo; e Aurelio Gómez e Miguel Anxo Fernández, coordinadores técnico e artístico do OUFF, respectivamente.

Cine e literatura

Tamén esta mañá, o Centro Cultural Marcos Valcárcel acolleu a presentación do traballo fin de grao, convertido en libro, de Dunia Álvarez. «A meca dos cines» trata a relación de O Grove (pontevedra) co mundo do cinema. Desa idea saíron o libro mais tamén un documental que presentou acompañada do alcalde do municipio pontevedrés, José Antonio Cacabelos Rico, e da concelleira de Cultura, Emma Torres Romay.

Na cinta e no texto, a autora fai un repaso histórico polas salas de cine que tivo o seu municipio, «que chegaron a ser catro, tres delas funcionando ao mesmo tempo na década dos 50 nunha localidade de 7.500 habitantes».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

O OUFF presenta o libro sobre a obra do director Xavier Bermúdez